«Ժողովուրդ» թերթը գրում է. «Նախօրեին հայտնի դարձավ, որ Փհենչհանում կայացող ձմեռային օլիմպիական խաղերի հայ մասնակից, դահուկորդ Աշոտ Կարապետյանը դահուկներ չունի, ինչի պատճառով չի կարող մարզվել: Մարզիկի մեկ զույգ դահուկներն առաջին պարապմունքի ժամանակ շարքից դուրս են եկել, և նա հայտնվել է բարդ իրավիճակում:
Պարզվում է` ֆեդերացիան ժամանակին Կարապետյանի համար դահուկներ չի պատվիրել, և հիմա նա հայտնվել է դժվար կացության առաջ: Օլիմպիական կոմիտեից հայկական պատվիրակության ղեկավար Բոլշիկյանը փորձել է դահուկներ գնել, սակայն չեն գտել:
Խնդրի շուրջ մեկնաբանությունների համար «Ժողովուրդ» օրաթերթը դիմեց ՀՀ սպորտի և երիտասարդության հարցերի նախարարություն: Նախարարի մամուլի քարտուղար Աստղիկ Մարտիրոսյանը նշեց, թե խնդիրը լուծման փուլում է:
Նրա խոսքով` Մոսկվայից պատվիրված դահուկներն այսօր կհասնեն մեր մարզիկին, և նա կկարողանա շարունակել պարապմունքները: Միաժամանակ Աստղիկ Մարտիրոսյանը շեշտեց, թե այս հարցով զբաղվելը նախարարության գործառույթների մեջ չի մտնում, և պատասխանատուն միայն Հայաստանի դահուկասպորտի ֆեդերացիան է:
Տեղեկացնենք, որ Աշոտ Կարապետյանի առաջին մրցելույթը փետրվարի 18-ին է»:
Առավել մանրամասն՝ թերթի այսօրվա համարում:
