Այսօր ԱԺ տնտեսական հարցերի հանձնաժողովի նիստում քննարկվելու է «Ելք» խմբակցության կողմից ներկայացրած օրենսդրական նախաձեռնությունը, որով առաջարկվում է փոփոխություններ կատարել Հարկային օրենսգրքում: Ինչպես արդեն նշել ենք, «Ելք-ը առաջարկում է իջեցնել բենզինի և սեղմված գազի վրա կիրառվող ակցիզային հարկը, վերադառնալով մինչև 2017թ. դեկտեմբերի 31-ը գործող դրույքաչափերին, և իջեցնել եկամտահարկի դրույքաչափերը: Հանձնաժողովի ՀՀԿ-ական անդամները ասում են, որ իրենց դիրքորոշումը բացասական է, և իրենք հանձնաժողովի նիստի ժամանակ դեմ են քվեարկելու այդ փոփոխությունների իրականացմանը: Սա նշանակում է, որ «Ելք»-ի նախագիծը կստանա հանձնաժողովի բացասական եզրակացությունը: Արդեն վաղը հրավիրված է ԱԺ արտահերթ նիստ, որի օրակարգում միայն մեկ հարց է՝ «Ելք» խմբակցության նախաձեռնության քննարկումը: Թեև ՀՀԿ-ականները հակված են մասնակցել տնտեսական հարցերի հանձնաժողովի նիստին, բայց արտահերթ նիստի մասնակցության հարցում նրանք միանշանակ դիրքորոշում չունեն:
ՀՀԿ-ականների մեծամասնությունը հակված չէ մասնակցել արտաhերթ նստաշրջանին, և համարում են, որ հարցը շրջանցելու լավագույն տարբերակը նիստը բոյկոտելն է: Խոսքը նրա մասին չէ, որ բոլոր ՀՀԿ-ականները չմասնակցեն նիստին: ԱԺ նախագահն ու փոխնախագահները կլինեն նախագահությունում, կլինեն նաև որոշ թվով ՀՀԿ-ականներ, բայց ոչ այնքան, որպեսզի ապահովեն անհրաժեշտ 53 պատգամավորի ներկայությունը: ՀՀԿ-ն ցանկանում է նիստի տապալման պատասխանատվությունը թողնել խորհրդարանական ընդդիմության վրա: «Ելք» և «Ծառուկյան» դաշինք խմբակցությունները միասին 40 պատգամավոր ունեն, և եթե նիստին առնվազն 13 ՀՀԿ և ՀՅԴ խմբակցությունների պատգամավորներ լինեն, ապա քվորումը կապահովվի և նիստը կկայանա: Բայց ՀՀԿ-ականների հաշվարկն այն է, որ եթե իշխանական կոալիցիան անհրաժեշտ 13 հոգին ապահովի, միևնույն է, «Ելք»-ն ու «Ծառուկյան» դաշինքը չեն ապահովի անհրաժեշտ 40 պատգամավորի ներկայությունը, և այդ դեպքում նիստի տապալման պատասխանատվությունը կընկնի ընդդիմության վրա:
Հանրապետականները ունեն նիստը բոյկոտելու քաղաքական բացատրություն: Նրանք ասում են, որ Հարկային օրենսգրքում փոփոխություններ կատարելու անհրաժեշտության հարցը փակված է այդ թեմայով կազմակերպված խորհրդարանական լսումներով, որտեղ գործադիր իշխանության ներկայացուցիչները շատ մանրամասն բացատրել են, որ այդ փոփոխությունները էականորեն չեն ազդում գնաճի վրա: Այդ խնդիրին խորհրդարանական հարցուպատասխանի ժամանակ անդրադարձել է վարչապետ Կարեն Կարապետյանը, բացատրելով, որ դիզվառելիքի թանկացումը ազդելու է միայն գյուղացիական տնտեսությունների վրա, բայց կառավարությունը սուբսիդավորելու է գյուղացիներին վաճառվող դիզվառելիքը, բենզինին կա այլընտրանք՝ գազը, իսկ գազի գինը վերադարձել է 2015թ. գնին, և այդ գնի պայմաններում հանրային տրանսպորտը աշխատել է գործող սակագներով: Արտահերթ նստաշրջանի ժամանակ չի կարող լինել որևէ նոր փաստարկ, որևէ նոր հիմնավորում, որը կարող է համոզել կառավարությանը փոխելու իր որոշումը և համաձայնվել Հարկային փոփոխությունների չեղարկմանը:
Իրականում կառավարությունը չի կարող վերադառնալ ակցիզային հարկի կամ եկամտահարկի նախորդ տարվա դրույքաչափերին բոլորովին այլ պատճառներով, որի մասին իշխանությունները չեն կարող խոսել: Հայաստանի արտաքին պարտքը վերջին տարիների ընթացքում աճում է երկրաչափական պրոգրեսիայով և դրա արդյունքում աճում է նաև այդ պարտքի սպասարկման համար պետական բյուջեից հատկացվող գումարները: 2013թ. Հայաստանը թողարկեց 700 մլն դոլար արժողությամբ եվրոբոնդեր, որոնց մարման ժամկետը լրանում է 2020թ: Հայաստանը արդեն մի քանի տարի կանգնած է դեֆոլտի շեմին, միայն թե, ի տարբերություն մյուս երկրների, որոնք դեֆոլտ հայտարարելուց հետո են հարկերը բարձրացնում, սառեցնում աշխատավարձերը և թոշակները, նվազեցնում սոցիալական ծախսերը, Հայաստանը այդ ռեժիմում է արդեն մի քանի տարի, առանց պաշտոնապես դեֆոլտ հայտարարելու: Հայաստանում հարկերը բարձրանալու են անընդհատ, և այնքան ժամանակ, քանի դեռ Հայաստանը չունի տնտեսություն, և ընթացիկ ծախսերը փակում է ոչ թե հարկային եկամուտներից գոյացած միջոցներով, այլ արտաքին պարտքը ավելացնելով: Իսկ պաշտոնապես դեֆոլտ չի հայտարարվում, որովհետև դրանից հետո այլևս որևէ մեկը պարտք չի տա:
Լուսանկարը՝ Photolure-ի
