Ֆրանսիայի մշակույթի նախարար Ֆրանսուազա Նիսենը մանրամասներ է հայտնել կեղծ նորությունների դեմ կառավարության կողմից նախապատրաստվող օրինագծից, որի մասին հունվարի սկզբին հայտարարել էր նախագահ Էմանուել Մակրոնը մամուլին հղված ուղերձում։
Ստահոդ լուրերի դեմ ֆրանսիական նախաձեռնությունը ստացել է «հուսալիության և տեղեկատվության հանդեպ վստահության մասին օրենք» անվանումը։ Նախարարի խոսքով՝ օրինագիծն արդեն գրեթե պատրաստ է։ Խորհրդարանական մեծամասնությունն այն կներկայացնի մոտ օրերս։
Օրենքը վերաբերվում է այնպիսի համացանցային հարթակներին, ինչպիսիք են Facebook-ն ու Youtube-ը, և «օտարերկրյա պետությունների ազդեցության տակ գտնվող ԶԼՄ-ները»։ Վերջինների շարքին են դասվում RT –ն ու Sputnik-ը, որոնք ֆինանսավորվում են Ռուսաստանից։ 2017 թվականի մայիսին ՌԴ նախագահ Վլադիմիր Պուտինի հետ համատեղ մամլո ասուլիսի ժամանակ Մակրոնը RT-ն ու Sputnik-ն անվանել էր «ազդեցության և ստահոդ քարոզչության մարմիններ»։
Եթե ֆրանսիական նախաձեռությունն ընդունվի, այն պետք է գործի ընտրություններից անմիջապես առաջ՝ առավելագույնը 5 շաբաթվա ընթացքում։ Այդ ժամանակ կարող է դադարեցվել կամ նույնիսկ հետ կանչվել օտարերկրյա պետության ազդեցության տակ գտնվող ԶԼՄ-ի հեռարձակումը, եթե վերահսկիչ մարմինը համարի, որ ԶԼՄ-ն տարածում է կեղծ տեղեկատվություն։
Ինչ վերաբերվում է համացանցային հարթակներին, ապա նախընտրական շրջանում դրանք պետք է հայտնեն, թե ով և ինչ գնով է խթանել այս կամ այն տեղեկությունները։
