Հայաստանի ազգային մրցունակության հիմնադրամի հրավերով այս տարի ապրիլին մեր երկիր եկած National geographic traveler ամսագրի խմբագրակազմի այցից հետո Հայաստանն օգոստոսի տասնհինգին ներկայացվել և հաղթել է դարձել ամսագրի «Տարվա հայտնություն» անվանակարգում:
Այսօր տեղի ունեցած մամուլի ասուլիսի ժամանակ այս մասին ասաց հիմնադրամի տնօրեն Արման Խաչատուրյանը` հավելելով, որ Հայաստանը զբոսաշրջության ոլորտում «Տարվա հայտնություն» է ճանաչվել ամբողջ աշխարհից 65 հազար մարդկանց առցանց քվեարկության արդյունքում:
Նա հիշեցրեց, որ National geographic traveler ամսագիրը լույս է տեսնում 8.6 միլիոն օրինակով, 36 լեզվով: «Ահա այսպիսի հեղինակավոր ամսագրի կողմից էլ մենք հաղթել ենք ամենահեղինակավոր անվանակարգում: Հիմնական անվանակարգերը 13-ն էին` «Լավագույն օպերատոր», «Լավագույն օդանավակայան» և այլն: Դրանցից ամենահեղինակավորը հենց «Տարվա հայտնություն» անվանակարգն էր:
Բացի դրանից՝ 44 երկրների շարքում Հայաստանը հաղթող է ճանաչվել նաև ՄԱԿ-ի զբոսաշրջային համաշխարհային կազմակերպության զբոսաշրջային պաստառների մրցույթում` «Եվրոպա» անվանակարգում «Քարերի սիմֆոնիա» պաստառով: Իսկ ահա տարեսկզբին Հայաստանը Լոս Անջելեսի միջազգային զբոսաշրջային ցուցահանդեսում հաղթող է ստացել է «Տարվա լավագույն տաղավար» մրցանակը»,- ասաց Արման Խաչատուրյանը:
Հայաստանի ազգային մրցունակության հիմնադրամի տնօրենի խոսքով, արտասահմանցի զբոսաշրջիկները Հայաստանում ամենաշատը գնահատում են խոհանոցը, հյուրընկալությունը և մարդկանց հարգանքը: «Հայաստանը նրանց փորձում ենք ցույց տալ իր ամբողջ բազմազանության մեջ: Միաժամանակ գիտակցում ենք, որ երկրի բրենդավորումը զբոսաշրջության անքակտելի մասն է: Մեր երկիրը միջազգային հարթակում այդքան էլ մեծ ճանաչում չունի, և այդ է պատճառը, որ պետք է աշխատել մեկ ընդհանուր բրենդի մշակման ուղղությամբ, բրենդի, որը հիշելով՝ զբոսաշրջիկըմիանգամից կասոցացնի բացառապես Հայաստանի հետ»,- ասաց նա:
