Տավուշի մարզի ընդհանուր իրավասության դատարանում Ռաֆիկ Մելքոնյանի նախագահությամբ ավարտվել է Լիանա Բլբուլյանի գործի դատավարությունը:
Ըստ մեղադրանքի՝ 29-ամյա Լիանան, Իջևանի Վասիլյան 7 հասցեում գործող շոգեբաղնիքում աշխատելով որպես մատուցողուհի, 2013 թվականի հունվարի 28-ից մինչև մարտի 30-ն ընկած ժամանակահատվածում շոգեբաղնիքը պարբերաբար տրամադրել է մարմնավաճառուհիներ Նարինեին, Անժելային, Ալիսային, ովքեր տարբեր տղամարդկանց հետ սեռական հարաբերություններ ունենալով՝ շոգեբաղնիքում զբաղվել են պոռնկությամբ:
Լիանա Բլբուլյանը մեղադրվում է պոռնկությանը նպաստելու համար՝ ՀՀ քրեական օրենսգրքի 262 հոդվածի 2-րդ մասի 5-րդ կետով:
Նախաքննության և դատաքննության ընթացքում Լիանան իրեն մեղավոր չի ճանաչել: Բայց դատական վիճաբանությունների փուլում հայտնել է, թե իրեն լիովին մեղավոր է ճանաչում, զղջում է կատարածի համար, սկսնակ աշխատող է եղել ու չի հասկացել արարքի հասարակական վտանգավորությունը:
Դատարանում վկայություններ են տվել մարմնավաճառուհիները:
Ըստ այդ վկաներից մեկի՝ 2013 թվականի հունվարից մինչև մարտ ինքը հաճախորդի հետ գնացել է Իջևան քաղաքի Վասիլյան փողոցում գտնվող շոգեբաղնիք, որտեղ 10 հազար դրամ «վարձավճարի դիմաց» սեռական հարաբերություն է ունեցել նրա հետ:
Շոգեբաղնիքի աշխատակցուհի Լիանան առաջարկել է շոգեբաղնիք այցելած տղամարդկանց ցանկության դեպքում զանգահարել իրեն, հրավիրել շոգեբաղնիք, որպեսզի որոշակի գումարի դիմաց սեռական հարաբերություններ ունենա: Ինքը չի մերժել:
Մարտ ամսից Լիանան այդպես էլ արել է, ու ինքը մի քանի անգամ նրա հրավերով գնացել է շոգեբաղնիք, «վարձավճարով» սեռական հարաբերություն ունեցել հաճախորդ տղամարդկանց հետ: Նրանց մի մասին ինքն ընդհանրապես չի ճանաչել:
Մյուս մարմնավաճառուհու ցուցմունքով՝ 2013 թվականի մարտին իր բջջայինին է զանգել շոգեբաղնիքի աշխատակցուհի Լիանան, առաջարկել է գնալ շոգեբաղնիք ու սեռական հարաբերություններ ունենալ հաճախորդների հետ: Ինքն ու ընկերուհին գնացել են, բայց տեսնելով, որ հաճախորդները ալկոհոլի ազդեցության տակ են, հրաժարվել են: Եղել է դեպք, երբ Լիանան հրավիրել է, ինքը գնացել է շոգեբաղնիք ու «վարձավճարի դիմաց» սեռական հարաբերություն է ունեցել անծանոթ տղամարդու հետ: Մատուցած ծառայության համար Լիանային գումար չի տվել:
Տղամարդ հաճախորդներից նրանք, ում նախաքննական մարմինն ի հայտ էր բերել, և ովքեր շոգեբաղնիքում օգտվել էին մատուցողուհի Լիանայի հրավերով այնտեղ գնացած մարմնավաճառուհիների ծառայություններից, ասել են, որ Լիանային որևէ գումար չեն տվել, վճարել են միայն մարմնավաճառուհիներին:
Դատարանը հաշվի է առել, որ Լիանայի խնամքին են մինչև 14 տարեկան երկու երեխաները: Նկատի է առնվել նաև այն, որ «ամբաստանյալի արարքը դրսևորվել է կարճ ժամանակահատվածում և ոչ շահադիտական նպատակով»:
Լիանա Բլբուլյանը մեղավոր է ճանաչվել պոռնկությանը նպաստելու համար, դատապարտվել է 3 տարի ազատազրկման, ապա նրա նկատմամբ պայմանական դատապարտություն է կիրառվել ու սահմանվել 4 տարի փորձաշրջան:
