Օրերս «Առաջին լրատվական»-ը «Հայաստան» համահայկական հիմնադրամին հարցում էր ուղարկել, թե ԲՀԿ առաջնորդ Գագիկ Ծառուկյանը մինչ օրս որքան գումար է նվիրաբերել հիմնադրամին և որ թվականին, քանի որ տեղեկություններ էին շրջանառվում, որ նա մինչ օրս որևէ նվիրատվություն չի արել մարաթոնների ժամանակ:
Եվ ահա, այսօր մենք վերջապես ստացանք հիմնադրամի պատասխանը, որտեղ մասնավորապես ասված է հետևյալը. «ԲՀԿ առաջնորդ Գագիկ Ծառուկյանը «Հայաստան» համահայկական հիմնադրամին վերջին անգամ նվիրատվություն (10 միլիոն ՀՀ դրամ) կատարել է «Հեռուստամարաթոն-2008»-ի շրջանակներում: Հարկ է նշել, որ վերջին տարիներին շատ բարերարներ իրենց նվիրատվությունները կատարում են անանուն, և չի բացառվում, որ Գագիկ Ծառուկյանը նրանց շարքերում է»:
Այն, որ Ծառուկյանը նվիրատվություն կաներ և անարձագանք կթողներ` գրեթե անհավատալի է: Նա բնավ էլ չի առաջնորդվում «թող աջ ձեռքը չիմանա, թե ձախն ինչ է անում» Աստվածաշնչյան սկզբունքով: Գոնե իրեն պատկանող հեռուստաընկերությամբ մի քանի օր շարունակ կթմբկահարվեր կատարված նվիրատվության մասին:
Երկրորդ ուշադրության արժանի փաստը գումարի չափն է: Նման խոշոր գործարարի համար 10 միլիոն դոլարը ծիծաղելի գումար է: Նրա համար, թերևս, մեկ-երկու օրով Դուբայ գնալու գումար: Համեմատության համար նշենք, որ օրինակ` 2011 թվականին նվիրատուների ցանկում են հայտնվել հայաստանյան օլիգարխներից մի քանիսը, որոնք բավական խոշոր նվիրատվություններ են կատարել: Օրինակ` Սամվել Ալեքսանյանը հիմնադրամին նվիրել է 200 հազար դոլար, Միխայիլ Բաղդասարովը, Բարսեղ Բեգլարյանը՝ 100 հազարական դոլար… «Զանգեզուրի պղնձամոլիբդենային կոմբինատը», որը պատկանում է Մաքսիմ Հակոբյանին, նվիրել է 500 հազար դոլար, իսկ «ՎիվաՍել-ՄՏՍ»-ը Ռալֆ Յիրիկյանի նախագահությամբ՝ 470 հազար դոլար… 300 հազար դոլար էին նվիրաբերել նաև «Բամո» ընկերության սեփականատեր Մուրադյան եղբայրները:
Ինչպես հայտնի է, հեռուստամարաթոնների ժամանակ ամենամեծ նվիրատվությունները սովորաբար անում են ռուսաստանաբնակ հայ գործարարներ Սամվել Կարապետյանը, Արա Աբրահամյանը և Լևոն Հայրապետյանը: Արա Աբրահամյանն անցած տարի նվիրաբերել է կես միլիոն դոլար, իսկ Սամվել Կարապետյանը` 1.5 միլիոն դոլար:
«Հայաստան» հիմնադրամի ամենամյա հեռուստամարաթոնների ընթացքում հանգանակված գումարների մեծության առումով առայժմ ռեկորդային է մնում «Հեռուստամարաթոն-2008»-ը, որի ժամանակ հավաքվեց ավելի քան 35 միլիոն դոլար: Այդ տարի և առհասարակ ամենամեծ նվիրատվությունը արել էր Սամվել Կարապետյանը` նվիրաբերելով 15 միլիոն դոլար:
«Հեռուստամարաթոն-2013»-ը կկայանա նոյեմբերի 28-ին, ամսվա վերջին հինգշաբթի օրը: Այս տարի մարաթոնի արդյունքում հավաքված գումարները կուղղվեն Վարդենիս-Մարտակերտ ավտոճանապարհի կառուցմանը: