Իշխանությունը համաժողովրդական ճշնումների ներքո պետք է հրաժարական ներկայացնի: Պետք է հասնել այն բանին, որ հասարակ քաղաքացին մասնակցի երկրի կառավարմանը: Դուրս ենք գալու հրապարակ ժողովրդի հետ ու Սերժ Սարգսյանին ժամանակ տանք, որ հրաժարական ստորագրի:
Լրագրողների հետ հանդիպմանը նման հայտարարություն արեց Հայաստանի դաշտային հրամանատարների խորհրդի անդամ Սուրեն Սարգսյանը՝ ստեղծված իրավիճակի ելք տեսնելով միայն իշխանափոխությունը:
Հարցին՝ որո՞նք կլինեն քայլերը, եթե իշխանությունը ինքնակամ չհեռանա, նա պատասխանեց, որ «Սերժ Սարգսյանը ժամանակ չունի ճամարտակելու: Եթե-ից հետո նոր ժողովրդի հետ կորոշենք՝ ինչ անել: Ժողովրդով, հոգևորականով: «Ակն ընդ ական»-ը Աստծուց տված գաղափար է»,- հայտարարեց բանախոսը՝ նշելով, որ չի բացելու խաղաքարտերը:
Սուրեն Սարգսյանը հայտնեց, որ ազատամարտիկներն ունեն իշխանափոխության մի քանի տարբերակ, այդ թվում՝ առաջարկ ունեն «Բարգավաճ Հայաստանի» միջոցով խնդիրները հասցնել Ազգային ժողով: Նա, չցանկանալով բացել փակագծերը, նշեց, որ իրենց կազմակերպած կլոր սեղաններին մասնակցում են քաղաքական ուժերը, որոնք հնարավոր է՝ մոտ ապագայում հանդես գան հայտարարությամբ:
«Իշխանափոխություն պետք է անենք: Պարզ ու առանց ցնցումների: Ազատամարտիկների ու որոշ կուսակցությունների օգնությամբ»,- ասաց նա՝ տեղեկացնելով, որ առաջիկայում իրենք հայտարարություն կստորագրեն, որին կարող է միանալ ցանկացած քաղաքական ուժ:
Անդրադառնալով վերջին շրջանում ազատամարտիկների կալանավորումներին՝ բանախոսը տրամաբանություն չի տեսնում դրանց մեջ: «Տրամաբանություն չկա կալանավորումների մեջ: Ծիծաղելի է՝ ինչ է կատարվում մեր երկրում»,- ասաց Հայաստանի դաշտային հրամանատարների խորհրդի անդամը:
Իր խոսքում նա անհասկանալի համարեց Երևանի ոստիկանապետ Աշոտ Կարապետյանի հայտարարությունն այն մասին, որ ոստիկանությունը կարող է «բիրտ ուժ կիրառել»: «Ոստիկանապետը ի՞նչ իրավունք ունի նման բան ասել: «Բեսպրիդելը» այն աստիճանի է, որ մարդիկ իրենց հաշիվ չեն տալիս՝ ոստիկանապե՞տ են, թե՞ ինչ»,- ասաց Ս.Սարգսյանը:
Հարցին՝ ի՞նչ է փոխվել վերջին 3 ամսում ազատամարտիկների որդեգրած քաղաքականության մեջ՝ բանախոսը պատասխանեց, որ իրենց աշխարհազորն է համալրվել՝ ունեն 3000-ից ավելի անդամ, շարունակում են հանդիպումները ջոկատների տղաների հետ ու գյուղերում փոքր հանրահավաքային հանդիպումներ են ունենում: Նրա խոսքով՝ իրավիճակն այնքան է սրվել, որ իրենց տղաներն անգամ պատրաստ են պաշտոնյա գնդակահարել:
Ըստ բանախոսի՝ իրենք ամեն ինչ անելու են, որ թույլ չտան քաղաքացիական պատերազմ: «Օտարածին ուժերին դա ձեռնտու է, այսպես՝ գողություններով թալանով, երկիրը հասցնում են, Աստված ոչ արասցե, քաղաքացիական պատերազմի»:,- ասաց նա:
Ս.Սարգսյանը տեղեկացրեց, որ շարունակելու են հանրահավաքները, ինտենսիվ հանդիպումները Ազատության հրապարակում:
Անդրադառնալով Շանթ Հարությունյանի կալանավորմանը՝ բանախոսն ասաց, որ «իշխանությունը սադրեց ու ձերբակալեց այդ մարդկանց: Մի քանի օր դեռ կսպասենք, տեսնենք, թե ինչ մեղադրանք կառաջադրվի նրան: Իշխանությունը դիմեց մանր ժուլիկության: Մենք չենք ժխտում Շանթի տեսակը: Նա բոլորի անունից խոսեց: Շանթը շատ չի մնալու անազատության մեջ»,- համոզված է նա:
Լուսանկարը՝ Aravot.am-ի