Բուլղարիայի մայրաքաղաք Սոֆիայում ուսանողները, որոնք իրենց դժգոհությունն են հայտնում կառավարության գործողություններից, դիմադրություն են ցույց տվել իրավապահ մարմիններին, որոնք փորձել են դուրս հանել նրանց Ազգային ժողովի հրապարակից:
Ինչպես հաղորդում է ITAR-TASS-ը, ցուցարարները դատարկ շշեր և այլ առարկաներ են նետել ոստիկանների վրա: Իրավապահ մարմիններին հաջողվել է մի քանի հարյուր ցուցարարների դուրս հանել հրապարակից: Հանրապետության ՆԳՆ տվյալներով՝ բողոքի ակցիայի հետևանքով ձերբակալվել է 12 մարդ:
Նախօրեին բուլղարացի ուսանողները վիճաբանության մեջ են մտել խորհրդարանի շենքի մոտ գտնվող ոստիկանների հետ: Միջադեպի հետևանքով տուժել է երկու մարդ, այդ թվում՝ մեկ ոստիկան: Ցույցին մասնակցել է մի քանի հարյուր մարդ: Սկզբում այն կրել է խաղաղ բնույթ: Իրավիճակը վերահսկողությունից դուրս է եկել այն ժամանակ, երբ ցուցարարները հրաժարվել են կատարել իրավապահ մարմինների պահանջները և դուրս գալ հրապարակի այն վայրից, որտեղ պատգամավորները կայանում են իրենց ծառայողական ավտոմեքենաները:
