Սիրիայի հեղափոխական և ընդդիմադիր ուժերի Ազգային կոալիցիայի կողմից Ստամբուլում ստեղծված, այսպես կոչված, «ժամանակավոր կառավարության» վարչապետ Ահմեդ Տոումեն երեքշաբթի խոստացել է կարգուկանոն հաստատել սիրիացի ապստամբների կողմից վերահսկվող շրջաններում:
Բնակչության անվտանգության ապահովումն ու հիմնական պահանջների բավարարումը նա համարել է իր կաբինետի առաջնահերթ խնդիրները:
Ստամբուլում Ազգային կոալիցիայի հանդիպմանը աջակցություն ստանալ հաջողվել է 8 նախարարների՝ հայտնում է «Ալ-Մայադին» հեռուստաալիքը: Տոումեն ստիպված կլինի նոր թեկնածուներ առաջադրել ներքին գործերի, առողջապահության և կրթության նախարարների պաշտոններում:
Ինչպես հայտարարել է Ազգային կոալիցիայի պաշտոնական ներկայացուցիչ Քամալ Լաբվանին, «ժամանակավոր կառավարությունն» ակնկալում է ֆինանսական օգնություն Պարսից ծոցի նավթարդյունահանող միապետություններից՝ ապստամբների վերահսկողության տակ գտնվող տարածքներում աշխատանքներ սկսելու համար:
Ազգային կոալիցիայի գլխավոր հովանավոր Սաուդյան Արաբիան արդեն խոստացել է 300 մլն դոլար հատկացնել:
