Ադրբեջանի նախագահի մամուլի քարտուղար Հաջիևը ԵԱՀԿ Մինսկի խմբի համանախագահների հետ հանդիպումից հետո հայտարարել է, որ ԼՂ խնդրի կարգավորման բանակցությունները կշարունակվեն Հայաստանում և Ադրբեջանում նախագահի ընտրություններից հետո։ Միջազգային փորձագետ, ԱԺ արտաքին հարաբերությունների հանձնաժողովի նախկին նախագահ, ՀՀՇ վարչության անդամ Հովհաննես Իգիթյանը «Առաջին լրատվական»-ի հետ զրույցում շեշտեց, որ այս հայտարարությունից հետո կրակոցները սահմանին շարունակվել են, և նորից հայ զինվոր է զոհվել: «Պատճառներից մեկն այն է, որ Ադրբեջանն այնքան էլ գոհ չէ այս տեսակի բանակցային փուլից»,- հավելեց Հովհաննես Իգիթյանը:
Անդրադառնալով Ադրբեջանում արտահերթ ընտրություններին՝ նա նշեց, որ Ալիևը դա մի քանի պատճառներից ելնելով է անում. «Կա Թուրքիա, որն այսօր կորցնում է խաղաղարար շրջանային դեմքը, գնալով կորցնում է իր կապերը բոլոր հիմնական խաղացողների հետ, իսկ Ադրբեջանի համար կարևոր է ունենալ ուժեղ Թուրքիա, և Ալիևը չգիտի՝ ինչ կլինի չորս ամիս հետո, և հստակ գիտի՝ ինքը կարող է լուծել այդ խնդիրը մեկ-երկու ամսվա ընթացքում՝ օգտագործելով այն հանգամանքը, որ իր բոլոր այլախոհները կամ գտնվում են բանտերում, կամ Ադրբեջանից դուրս»,- հավելեց միջազգային փորձագետը:
Նա նշեց, որ պատերազմի սպառնալիքը կա, և դրա հորդորողներից մեկն էլ Ռուսաստանն է, որը շարունակում է մասսայական ոչնչացման զենք մատակարարել և վարժեցնել Ադրբեջանին այդ զենքը օգտագործել:
Ամբողջությամբ՝ տեսանյութում: