Նախորդ տարի Հայաստանում առաջին անգամ մեկնարկած The Voice միջազգային նախագիծը շատերին ինքնադրսևորվելու հնարավորություն տվեց: Այս տարի ընտրված չորս մարզիչները՝ Հայկոն, Շուշան Պետրոսյանը, Քրիստինե Պեպելյանը և Միքայել Պողոսյանը, 130 մասնակիցներից ընդհանուր առմամբ ընտրեցին 40 լավագույնների: Նախագծի առաջին փուլում քննադատություններ հնչեցին մարզիչների հասցեին: Եղան հաջողված և անհաջող կատարումներ:
«Առաջին լրատվական»-ի զրուցակիցն է «Հայաստանի ձայնը» հեռուստանախագծի մարզիչ Հայկոն, ով օր ու գիշեր աշխատում է թիմի հետ:
– Հայկո, ընդգրկվել եք «Հայաստանի ձայնը» ժյուրիի կազմում, ինչպե՞ս եք գնահատում այս շրջանը: Որպես մարզիչ՝ ի՞նչ դժվարություններ հաղթահարեցիք «Կույր լսումներ»-ի փուլում: Որքան գիտեմ՝ նախորդ տարի էլ մարզիչ լինելու առաջարկ կար, բայց հրաժարվեցիք:
– Այո, դեռ նախորդ տարի էի ստացել մարզիչ լինելու առաջարկը, սակայն նախընտրեցի լինել երաժշտական պրոդյուսեր, իսկ այս տարի սիրով համաձայնվել եմ լինել մարզիչ: Այս տարի դժվարությունը մեկն է՝ տաղանդավոր երգիչները շատ էին: Եվ 125 մասնակցից ընտրել 40-ին շատ դժվար և դաժան գործ է մարզչի համար:
– Արդյոք հետևո՞ւմ եք սոցցանցերի քննադատությանը, ի՞նչ եք կարծում՝ արդարացի՞ քննադատություններ էին հաճախ մարզիչների հասցեին հնչում, թե՞ ոչ, հատկապես «Կույր լսումների» ընթացքում:
– Հետևում եմ, բայց կասեմ մի բան, որ ցավոք, չգիտեմ՝ ինչ է կատարվում: Սոցիալական ցանցերում մոդայիկ է դարձել քննադատելը, ինչը արվում է բոլոր բնագավառներում ու ամենակարևորը՝ պատեհ-անպատեհ: Կարող է ինչ-որ մեկը մի անկապ միտք է գրում, և կայքերը վերցնում ու տպագրում են: Այդ անհեթեթությունից հետո էլ սկսվում է այդ նույն անհեթեթության շարունակությունը՝ արդեն մեկնաբանությունների տեսքով: Ես գիտեմ, որ ես իմ խղճի առաջ մաքուր եմ: Բոլոր նրանք, ովքեր գոնե մի քիչ հետևել են իմ գործունեությանը, գիտեն, որ միշտ գլուխս կախ աշխատել եմ և ամենակարևորը՝ միշտ ցանկացել եմ, որպես հայ երաժիշտ ու երևանցի, լինել շատ լավը՝ որտեղ էլ լինեմ:
– Դուք ի՞նչ սկզբունքներով եք առաջնորդվում, գնահատում եք միայն ձա՞յնը, թե՞…
– Գիտեք՝ առաջին փուլում «Կույր լսումներն» են: Եվ մենք հնարավորություն ունենք միայն լսելու: Ուստի ես առաջնորդվում էի այդ պահի զգացողություններով և կատարումներով, և պտտվում էի միայն այն դեպքում, երբ ինձ շատ էր դուր գալիս կատարումը:
– Կարծում եք՝ քննադատությունները նրանից են, որ իրավիճակին մարդիկ չե՞ն տիրապետում:
– Քննադատությունները հասնում են զավեշտի: Բնականաբար, ես ինձ թույլ չեմ տվել և թույլ չեմ տա պատասխանել: Բայց կարծում եմ՝ սխալ է «Հայաստանի ձայնը» համեմատել Երկիր մոլորակի վրա ամենամեծ տեղը գրավող երկրների հետ: Բնականաբար, այնտեղ ծախսվում են ահռելի գումարներ: Բնականաբար, այնտեղ ավելի շատ են տաղանդավորները՝ նաև տարբեր երկրներից և այլն: Մենք ուղղակի շատ ուրախ պետք է լինենք, որ շնորհիվ «Արմենիա» հեռուստաընկերության՝ մեր քաղաքում ունենք այս հնարավորությունը: Եվ ուրախանալու փոխարեն մենք էլի դժգոհ ենք (բայց, իհարկե, սա վերաբերում է բողոքող օգտատերերին), որովհետև այն մարդիկ, ովքեր ուրախ են այս նախագծի համար, ավելի շատ են: Սա է վկայում նաև նախագծի բարձր վարկանիշը:
– Արդյոք տարեցտարի ավելի չի՞ դժվարանում նոր տաղանդների բացահայտումը:
– Մենք ուղղակի շատ ուրախ պետք է լինենք, որ շնորհիվ «Արմենիա» հեռուստաընկերության՝ ունենք հնարավորություն բացահայտելու տաղանդավորներին: Իրականում ես չէի հավատում, որ այսքան լավ արտիստներ կան Հայաստանում: Ասում եմ՝ արտիստներ, որովհետև իրոք շատերը պատրաստի արտիստներ են: Ես շատ ուրախ եմ, որ կա «Հայաստանի ձայնը» պրոյեկտը, կա նման հնարավորություն, և հուսով եմ, որ իմ թիմը կլինի լավագույններից: Իսկ սոցցանցերի օգտատերերին միևնույն է՝ սիրում եմ, որովհետև իմն են:
