Այս տարին 43-ամյա Ալան Ժեամին անսպասելի անակնկալ է մատուցել՝ վերջերս Փարիզում նրա բացած ռեստորանն արժանացել է «Միշլեն» աստղի: Դա խոհարարական որակի բարձրագույն նշանն է աշխարհում, գրում է Agence France-Presse-ը:
«Ես երբեք չեմ մտածել, որ «Միշլենը» կհետաքրքրվի ինձ պես մեկով՝ ինքնուսով, ով 19 տարեկանում փողոցում է քնել և իր ճանապարհը սկսել է սպասք լվալով… Սա հաճելի անակնկալ է»,- ասել է Ժեամը պարբերականին տված հարցազրույցում:
Ալանը մանկուց երազել է խոհարար դառնալ: Դպրոցից հետո նա շունչը պահած խոհարարական հաղորդումներ է դիտել հեռուստացույցով:
Ուրիշների համար պատրաստել Ժեամը սկսել է Լիբանանի բանակում:
Նա Փարիզ է գնացել առանց գրոշի: Ֆրանսերեն չի իմացել: Դժվարությամբ ռեստորանում ընդունվել է սպասք լվացողի աշխատանքի: Իր ստացած գումարը չի բավարարել տուն վարձելու համար, և Ալանը քաղաքային զբոսայգու նստարանի վրա է քնել:
Ժեամին պատահականությունն է օգնել: Մի անգամ երբ ռեստորանում շատ այցելու է եղել, շեֆ-խոհարարը ձեռքը խորը կտրել է դանակով: Նրան հիվանդանոց են տարել: Ռեստորանի տերը հուսահատված է եղել: Ալանը ռիսկի է դիմել՝ առաջարկել է ուտեստներ պատրաստել:
Նրա պատրաստած ուտեստներն այդ երեկո հիացրել են այցելուներին: Իսկ ռեստորանի տերն աշխատանքային օրվա վերջում բացականչել է. «Դու իսկապես կարողանում ես պատրաստել»:
«Ես պատրաստում եմ մարդկանց ուրախություն պարգևելու համար»,- նշում է Ժեամը:
