Ինչպես և սպասվում էր կիրակի օրը Արարատի քաղաքապետի ընտրություններում հաղթեց Հանրապետական կուսակցության թեկնածու Հայկ Հայկյանը: Բայց այնպես չէ, որ «Բարգավաճ Հայաստան» կուսակցության թեկնածու Սամվել Բարսեղյանի օգտին քիչ մարդ է քվեարկել: Եթե ՀՀԿ-ի թեկնածուն ստացել է 4544 ձայն, ԲՀԿ-ի թեկնածուն ստացել է 4214 ձայն՝ ընդամենը 330 քվեով պակաս: Եվ սա այն պայմաններում, երբ իշխանություններն օգտագործել են վարչական ու ֆինանսական բոլոր միջոցները: Իհարկե, այնպես չէ, որ ԲՀԿ-ն նման միջոցներ չի օգտագործել: Հայտնի է, որ ԲՀԿ ղեկավար Գագիկ Ծառուկյանին է պատկանում Արարատի ցեմենտի խոշոր գործարանը, որտեղ մոտ 2000 մարդ է աշխատում: Այսինքն` այդ մարդիկ իրենց ընտանիքի անդամներով քվեարկել են ԲՀԿ թեկնածուի օգտին: Այդ կուսակցության դեպքում նույնպես ընտրակաշառք բաժանելու կարծիքներ են հնչել: Այնուամենայնիվ բոլորովին էլ չէր բացառվում, որ արդար ընտրությունների դեպքում հաղթեր ԲՀԿ-ի թեկնածուն:
Սակայն այս դեպքում խնդիրը միմյանց նկատմամբ այդ երկու կուսակցությունների վերաբերմունքի աստիճանական փոփոխությունն է: Անցած տարվա աշնանից՝ նախագահական ընտրությունների քարոզարշավից սկսած այս կուսակցությունների ճանապարհները կտրուկ խաչվեցին: Եվ եթե մինչև այդ ՀՀԿ-ն թույլ էր տալիս, որ որոշ համայնքներում, նույնիսկ քաղաքներում հաղթեն ԲՀԿ-ի թեկնածուները, ինչպես, օրինակ, անցած տարի Եղեգնաձորի կամ Իջևանի քաղաքապետեր դարձան ԲՀԿ անդամներ Դավիթ Հարությունյանը և Վարդան Ղալումյանը, ապա նախագահական ընտրություններից հետո, երբ Գ. Ծառուկյանն ու իր ԲՀԿ-ն չպաշտպանեցին Սերժ Սարգսյանի թեկնածությունը, իշխանությունները սկսեցին իրենց վերաբերմունքը խստացնել այդ կուսակցության նկատմամբ:
Շրջանառվող տեղեկությունների համաձայն` Գ. Ծառուկյանն իր կուսակցության անդամ համայնքապետերին միշտ ստիպել է ընտրությունների ժամանակ ամեն գնով առավելագույն ձայներ ապահովել ԲՀԿ-ի կամ ԲՀԿ-ի թեկնածուի համար, և ԲՀԿ-ական համայնքապետերն ամեն գնով այդպես էլ արել են: Իհարկե, հայաստանյան ընտրությունների պայմաններում դա նորմալ է. եթե ՀՀԿ-ն պետք է ընտրակաշառք և վարչական լծակներ օգտագործի, ապա ինչու նույնը չի կարող անել ԲՀԿ-ն, հատկապես երբ ունի այդ հնարավորությունը:
Սակայն Արարատի ընտրությունները ցույց տվեցին, որ ՀՀԿ-ն այսուհետ «անողոք» է լինելու ոչ միայն ընդդիմության, այլև այլընտրանքային ԲՀԿ-ի նկատմամբ: Նման վերաբերմունքի նպատակը հաջորդ ընտրություններից հետո իշխանության հարցը լուծելու խնդիրն է: Այդ երկու կուսակցություններն այսօրվա իրենց գործողություններն արդեն պայմանավորում են 2017թ. խորհրդարանական ընտրություններով: Հայտնի է, որ 2018թ. նախագահական ընտրություններին Սերժ Սարգսյանն այլևս չի առաջադրվելու, քանի որ այս տարի նա երկրորդ անգամ ընտրվեց: Այս պարագայում բավականին կարևոր են նախագահական ընտրություններից առաջ տեղի ունեցող խորհրդարանական ընտրությունները:
ՀՀԿ-ն այժմ աշխատում է ամբողջությամբ իր ձեռքում կենտրոնացնել նախորդ տարիներին դուրս մնացած լծակները կամ էլ եղածներից ոչինչ չզիջել որևէ այլ ուժի, որպեսզի 2017-ի խորհրդարանական ընտրություններին տխուր անակնկալի առաջ չկանգնի: Եվ որքան էլ ոչ իշխանական կուսակցությունները միավորվեն և հզոր թեկնածու առաջադրեն, միևնույն է` նրանք չեն կարողանա ճեղքել ընտրություններին գործող պետական ապարատի կուռ պատնեշը: Այնպես, ինչպես 2008թ. դա չհաջողվեց Լևոն Տեր-Պետրոսյանին ու նրան սատարող տասից ավելի ուժերին, որոնք այն ժամանակ ունեին ժողովրդական հզոր աջակցություն: Փորձը ցույց է տալիս, որ խորհրդարանական ընտրություններին հաղթած կուսակցությունը մեծ հավանականությամբ կարող է հաղթել նաև նախագահական ընտրություններին, քանի որ վարչական ռեսուրսները, պետական ապարատն ու ֆինանսական հսկայական հնարավորություններն այդ ուժի ձեռքում կլինեն: Այստեղ արդեն էական չէ, թե ով կլինի ՀՀԿ-ի՝ նախագահի թեկնածուն: Հատկապես, որ կարծիք կա, թե նախատեսվող սահմանադրական փոփոխությունների արդյունքում նախագահի լիազորությունների հաշվին ուժեղացվելու են վարչապետի լիազորությունները:
Փաստորեն, Արարատում տեղի ունեցած ընտրություններով ՀՀԿ-ն ԲՀԿ-ին հասկացրեց, որ հույսը կտրի թե՛ 2017, թե՛ 2018 թվականների ընտրություններում ոչ միայն հաղթելու, այլև մեծ քվեներ ստանալու ակնկալիքից: Արդեն իսկ ակնհայտ է, որ իշխող ՀՀԿ-ն մյուս կուսակցություններին ու հատկապես ԲՀԿ-ին ցանկանում է այնպիսի վիճակի մեջ դնել, այնքան թուլացնել, որ իրենից ուժ չներկայացնի, և առաջիկա ընտրություններում նրա հետ հաշվի նստելու ու բանակցելու խնդիր չառաջանա: Այնպես, ինչպես մեկ տարի առաջ բանակցում էին նախագահական ընտրություններին աջակցություն ստանալու համար, բայց ԲՀԿ-ն այդպես էլ Սերժ Սարգսյանին պաշտպանելու մասին հայտարարություն չարեց: