ԱՄՆ պետքարտուղար Ջոն Քերին ԱՄԷ այցի ընթացքում հայտարարել է, որ առաջընթացի մեծ քայլ է համարում ժնևյան համաժողովին մասնակցելու հարցում սիրիական ընդդիմության համաձայնությունը: Այս մասին հայտնում է Reuters գործակալությունը:
Ինչպես ավելի վաղ տեղեկացրել էինք՝ Սիրիական ընդդիմադիր և հեղափոխական ուժերի ազգային կոալիցիան համաձայնել է մասնակցել Սիրիայի հարցով «Ժնև-2» խաղաղ համաժողովին: Որոշումն ընդունվել էր Ստամբուլում հանդիպման արդյունքներով: Փաստաթուղթը մի շարք պայմաններ է պարունակում, որոնք պետք է կատարվեն մինչ Ժնևում համաժողովի աշխատանքի սկսվելը: Այդ պայմանների մասին մանրամասներ չեն հաղորդվում:
Ավելի վաղ կոալիցիայի առաջնորդ Ահմեդ Ջարբան հայտարարել էր, որ սիրիական ընդդիմությունը մտադիր չէ մասնակցել համաժողովին այնտեղ Իրանի պատվիրակության ներկայության դեպքում, ինչպես նաև եթե համաժողովի մեկնարկից առաջ չսահմանվեն Ասադի ռեժիմի հեռանալու ժամանակային շրջանակները: Բացի դրանից՝ մասնակցության նախապայման էր համարվել համաժողովին ընդդիմության մարտական թևի ներկայացուցիչների ներկայությունը, ինչպես նաև սիրական հարցի վերաբերյալ Ռուսաստանի դիրքորոշման մասին գրավոր հայտարարությունը:
«Դա առաընթացի մեծ քայլ է, և մենք կշարունակենք աշխատել սիրիական կարգավորման այդ և այլ հարցերի շուըջ»,- ասել է Քերին ԱՄԷ-ի արտգործնախարար, շեյխ Աբդալլա բեն Զաիդ Ալ Նահայանի հետ համատեղ մամլո ասուլիսի ժամանակ:
Քերին նաև ընդգծել է, որ բանակցությունները սիրիական հարցի կարգավորման միակ ուղին են, և հույս է հայտնել կարճ ժամկետներում անցկացնել «Ժնև 2»-ը:
