Վրաստանում բարձրագույն ղեկավարության փոփոխությունից հետո ավելի են ակտիվացել խոսակցությունները Հայաստանի և Ռուսաստանի միջև ուղիղ երկաթուղային հաղորդակցության վերագործարկման մասին, որի հանգուցալուծումը կախված է Վրաստանի դիրքորոշումից: Դեռևս Վրաստանում կայացած խորհրդարանական ընտրություններից հետո որոշակի կերպով ակտիվացավ Վրաստանի և Ռուսաստանի միջև քաղաքական երկխոսությունը, սակայն հարաբերությունների վերականգնման շուրջ տարաձայնությունները մնում են, և չի բացառվում, որ անհրաժեշտ լինի Հայաստանի աջակցությունը՝ որպես երկու երկրների գործընկերոջ:
«Առաջին լրատվական»-ի հետ զրույցում Ռազմավարական և միջազգային հետազոտությունների վրացական հիմնադրամի տնօրեն, վրաստանցի քաղաքական վերլուծաբան Ալեքսանդր Ռոնդելին նշեց, որ Հայաստանը կարող է կամրջակ լինել Վրաստանի և Ռուսաստանի միջև:
Խոսելով Աբխազական երկաթուղու վերաբացման հնարավորության շուրջ՝ քաղաքագետն ասաց, որ այդ հարցն, իհարկե, ներկայումս քննարկվում է, բայց դրա օրակարգ վերադարձը կախված է Վրաստանի և Ռուսաստանի միջև քաղաքական որոշ նյուանսներից և տարաձայնություններից, որոնք մինչ այսօր դեռևս լուծված չեն: Նրա գնահատմամբ՝ ներկայումս մեծ անորոշություն կա վրաց-ռուսական հարաբերություններում, և կոնսենսուսի ընդհանուր սկզբունքներ դեռևս չեն ձևավորվել, ուստի Վրաստանը չի կարող այս նախագծին իր հավանությունը տալ:
«Դեռևս նույնիսկ չի նկատվում, որ Վրաստանի ներկայիս իշխանությունը ցանկանում է ՌԴ-ի հետ վերականգնել դիվանագիտական հարաբերությունները: Իշխանությունները ցանկանում են ՌԴ-ի հետ նորմալացնել իրենց հարաբերությունները, սակայն նորմալացնելը ՌԴ-ն ու Վրաստանը տարբեր կերպ են ընկալում և մեկնաբանում: Այսինքն՝ տարակարծությունները շատ են: Նորմալացնել նշանակում է լավ, բարեկամական հարաբերություններ, ոչ թե օկուպացիա: Երկխոսություն պետք է լինի, բայց ներկայումս Ռուսաստանի և Վրաստանի միջև դա չի երևում»,- մեկնաբանեց Ալեքսանդր Ռոնդելին:
Ռուսաստանի և Վրաստանի հարաբերությունների նորմալացմանը նպաստելու Հայաստանի հնարավոր առաքելությանն անդրադառնալով՝ նա ասաց, որ Հայաստանը միշտ եղել է Վրաստանի գործընկերը, նաև ամենամոտ հարևան երկիրը: Քաղաքագետի կարծիքով՝ Հայաստանն ու Վրաստանը միշտ են բարեկամական հարաբերություններ ունեցել, և նա հուսով է, որ ապագայում դրանք ավելի լավն են լինելու: Բայց նա նաև ակնարկեց, որ Վրաստանի ներկայիս իշխանությունները չեն փոխի իրենց վերաբերմունքն ու քաղաքականությունը Հայաստանի նկատմամբ:
Ռոնդելին նշեց, որ ՀՀ-ն ու Վրաստանը հարևաններ են և պատմականորեն մոտ են իրար, թեև կա որոշակի տարբերություն՝ կապված տարբեր աշխարհաքաղաքական վեկտորների հետ: Նրա համոզմամբ՝ Հայաստանը կարող է Վրաստանի և Ռուսաստանի միջև որոշակի հաշտեցնող դերակատարություն ունենալ, բայց եթե կարելի է առանց հարաբերությունների միջև կամրջի ամեն ինչ կազմակերպել, ինչո՞ւ է պետք կամուրջը: ըստ նրա՝ եթե երկու կողմերն ունեն լավ հարաբերություններ կամուրջ հարկավոր չէ, եթե չկան այդ հարաբերությունները, ապա կամուրջն անհրաժեշտ է:
«Սկզբնական շրջանում ՌԴ-Վրաստան հարաբերություններում կամրջակ է անհրաժեշտ, իսկ այդ դերը կարող է ստանձնել Հայաստանը»,- ասաց Ալեքսանդր Ռոնդելին:
