ԱՄՆ նախագահ Դոնալդ Թրամփն իր ընտրվելու պահից ի վեր հանդես է եկել քննադատությամբ՝ հասցեագրված 181 քաղաքական գործիչների, կազմակերպությունների կամ երկրների։ Ցուցակը հրապարակվել է The New York Times-ի կողմից։
Հրապարակման մեջ նաև նշվել է, թե ինչպիսի հավակնություններ է հնչեցրել ԱՄՆ նախագահը։
Ամենից հաճախ իր մեկնաբանություններում, որոնք հրապարակվել են Twitter սոցցանցում, Թրամփը հիշատակել է ամերիկյան ԶԼՄ-ները, որոնց պիտակավորել է որպես «կեղծ», «կոռումպացված» և «անարդար»։ Մասնավորապես, նախագահը հիշատակել է նաև The New York Times-ին, որին անվանել է «ամերիկացի ժողովրդի թշնամի»։
Թրամփը քննադատել է նաև նախագահական ընտրությունների իր մրցակից Հիլարի Քլինթոնին։ Պետության ղեկավարը նրան բազմիցս անվանել է կեղծավոր։ Հանրապետականը քննադատել է նաև ԱՄՆ նախկին նախագահ Բարաք Օբամային՝ բնութագրելով նրան որպես թուլամորթ։
Իր հրապարակումներում նախագահը ոչ հազվադեպ հիշատակել է իր մասին «Կրակ և ցասում. Թրամփի Սպիտակ տան ներսում» գրքի հեղինակ, լրագրող Մայքլ Վուլֆին։ Ստեղծագործությունն ինքնին նախագահն անվանել է «ստահոդ և ձանձրալի»։
