«Առաջին լրատվական»-ի տեղեկություններով` ոստիկանության աշխատակիցները Մեղրիի սահմանապահ ջոկատի ծառայողների հետ բացահայտել են թմրամիջոցների անօրինական շրջանառության հերթական դեպքը:
Երեկ` ժամը 16.40-ին, Նորագյուղ թաղամասից իր OPEL մակնիշի ավտոմեքենայով ոստիկանության ԿՀԴՊ գլխավոր վարչություն բերման է ենթարկվել երևանցի 48-ամյա Արմեն Անդրեասյանը` ուղևորուհու` «Էլի» մականունով իրանցի Էլհամ Ղասեմի Շիրխանիի հետ:
Խուզարկությամբ Շիրխանիի կրծկալի միջից հայտնաբերվել է պահպանակում փաթեթավորված մոտ 24 գրամ «Մետամֆետամին» տեսակի թմրամիջոցի նմանվող զանգված, իսկ ներքնազգեստի միջից` սպիտակ անձեռոցիկով փաթեթավորված, առանց գրառման 90 դեղահաբ, բացի այդ, դեղին և կանաչ գույնի FLUXETINE 20 գրառմամբ 5 դեղահաբ էլ հայտնաբերվել է նրա ուսապարկից:
Նշենք, որ սահմանը հատելիս Շիրխանին պահպանակում փաթեթավորված մոտ 24 գրամ «Մետամֆետամին» տեսակի թմրամիջոցի նմանվող զանգվածը թաքցրել էր հեշտոցում:
Ըստ Էլհամ Ղասեմի Շիրխանիի հայտարարության` պահպանակի պարունակությունը «Մետամֆետամին» թմրամիջոց է, սակայն ներքնազգեստից հայտնաբերվածը հոգեմետ դեղահաբեր են, որոնք բերել է Հայաստանում բնակվող ոմն Զորիկի համար:
Մեր տեղեկություններով` հայտնաբերվել և բերման է ենթարկվել ոմն Զորիկը` 29-ամյա Զոհրաբ Ստեփանյանը, ինչպես նաև 44-ամյա Հակոբ Մուրադյանը:
Ինչպես տեղեկացանք ոստիկանությունից, նախաքննության նախնական տվյալներով`Էլհամ Ղասեմի Շիրխանին նման եղանակով ԻԻՀ-ից պարբերաբար անօրինական թմրամիջոցներ է տեղափոխել Հայաստան:
Հայտնաբերված անօրինական զանգվածը փաթեթավորվել և ուղարկվել է ՀՀ ԳԱԱ Փորձաքննությունների ազգային բյուրո:
Փաստի առթիվ հարուցվել է քրեական գործ` քրեական օրենսգրքի 215 հոդվածի 2-րդ մասի հատկանիշներով:
Էլհամ Ղասեմի Շիրխանին ու Զոհրաբ Ստեփանյանը ձերբակալվել են:
