ԱԺ նախագահ Հովիկ Աբրահամյանն այսօր, ելույթ ունենալով Արարատի քաղաքապետի ՀՀԿ-ական թեկնածու Հայկ Հայկյանի հանրահավաքին, նշեց, որ իր համար «մատ թափ տալ արարատցու վրա» ձևակերպումն անհասկանալի և անընդունելի է: Նրա խոսքով՝ որևէ մեկն՝ այս կամ այն թևից, չի համարձակվի արարատցու վրա մատ թափ տալ, քանի որ այդ մոտեցումն ի սկզբանե դատապարտված է:
Նա նշեց, որ Արարատի քաղաքապետի ընտրություններում պետք է ընտրվի ինտելեկտուալը, արժանավորը, ով բարձր մակարդակ ունի: Բացի այդ, նա ասաց, որ ՀՀԿ-ական թեկնածուն ոչ մի շռայլ խոստում չի տվել, իսկ այն ինչ խոստացել է անպայման իր օգնությամբ կյանքի կկոչվի: «Դուք պատկերացնում եք՝ ես մատ թափ տվողների հետ ամեն օր եմ շփվում»,- ասաց Աբրահամյանը՝ ներողություն խնդրելով բոլոր նրանց փոխարեն, ովքեր մատ էին թափ տվել:
Նա նաև նշեց, որ ստախոսի ոտքը կարճ է, քանի որ ժողովուրդը ոչինչ չի մոռանում: Հովիկ Աբրահամյանը համոզված է, որ ժողովուրդը ճիշտ ընտրություն է կատարելու: Նրա խոսքով՝ ՀՀԿ-ին միշտ քննադատել են, լավ գործերը վերագրել են իրենց, իսկ վատերը՝ ՀՀԿ-ին: Հովիկ Աբրահամյանն անկեղծացավ. «Այո, ունենք վատ չինովնիկներ, բայց մենք կամաց-կամաց ազատվում ենք նրանցից»:
Հիշեցնենք, որ նոյեմբերի 10-ին Արարատ քաղաքում տեղի կունենան Արարատի քաղաքապետի ընտրություններ, որտեղ պայքարն ընթանալու է ՀՀԿ-ական թեկնածու Հայկ Հայկյանի և ԲՀԿ-ական Սամվել Բարսեղյանի միջև:
