Հաստատված կարելի է համարել լուրը, որ գեներալ-մայոր Արթուր Օսիկյանն ազատվել է արդարադատության նախարարության Քրեակատարողական վարչության պետի պաշտոնից: Օսիկյանը Սերժ Սարգսյանի շրջապատի ամենաերիտասարդ ու վստահելի գեներալներից մեկն է, որը, մեծ հաշվով, բարեփոխիչի իմիջ ունի և ներքաշված չէ ծառայողական կամ օլիգարխիկ սկանդալներում: Օսիկյանը ՔԿՀ պետ էր 2014-ից, և այսօր, ըստ էության, ոչ թե պաշտոնանկ է արվում, այլ ընդամենը տեղափոխվում է ոստիկանություն` պետի տեղակալի կարգավիճակով: Օսիկյանն այդ պաշտոնում արդեն աշխատել է` 2009-14թթ-ին, և այդ փուլում եղել է ոստիկանությունում իրականացված մեծածավալ բարեփոխումների հեղինակը, մասնավորապես նրա անվան հետ է կապվում անձնագրային ծառայության ինստիտուցիոնալ ռեֆորմը:
Արթուր Օսիկյանը վերադառնում է ոստիկանություն և սա ազդանշան է, որ Սերժ Սարգսյանը համակարգային տրանսֆորմացիայի ամենապատասխանատու փուլում ամրացնում է իր դիրքերը ոստիկանությունում, նաև ընդգծում է այդ ծառայության կարևորությունը իր ծրագրերի իրականացման համատեքստում:
Սակայն Օսիկյանի վերադարձը ավելի խորքային գործընթացների հետ է կապված, մանավանդ, որ երեկ հստակեցվեց ուժային այս մարմնի կարգավիճակը Հայաստանի նոր պետական համակարգում: Ապրիլից հետո ոստիկանությունը դառնում է վարչապետին ենթակա մարմին` ըստ էության, դուրս գալով կառավարության կոլեգիալ վերահսկողությունից: Եթե ապրիլին Սերժ Սարգսյանն է զբաղեցնում վարչապետի պաշտոնը, ապա սկզբունքորեն ամեն բան մնում է այնպես` ինչպես այսօր է: Այլ վարչապետի պարագայում ամեն բան ավելի բարդ ու բազմաշերտ է ստացվում, որովհետ Սերժ Սարգսյանն այսօրվա նշանակումով ավելի է ուժեղացնում իր դիրքերը ոստիկանությունում, որն ապրիլից հետո կարող է դե ֆակտո լինել ոչ թե Կարեն Կարապետյանին ենթակա, այլ վերահսկող մարմին:
Արթուր Օսիկյանի կադրային փոխաստեղումն ուշագրավ է մեկ այլ դիտանկյունից ևս: Արդյո՞ք Սերժ Սարգսյանը համարում է, որ Վովա Գասպարյանի թիկունքն ուժեղացնելու կարիք կա, մանավանդ, որ ՊՊԾ գնդի 2016-ի իրադարձություններից հետո ոստիկանությունը, ըստ էության, հայտնվել է հարվածների թիրախում` բոլոր կողմերից, ինչն օբյեկտիվորեն ազդել է` մի կողմից, ոստիկանության հեղինակության, հանրային ընկալման, մյուս կողմից` Գասպարյանի համակարգային կշռի վրա:
Վլադիմիր Գասպարյանը Սերժ Սարգսյանի նախագահության շրջանում հավատարմորեն պաշտպանել է նրա իշխանության, պատկերավոր ասած, առաջնագիծն ու թիկունքը: Արդյո՞ք հիմա էլ Սարգսյանը զգում է Գասպարյանի աջակցության կարիքը և Օսիկյանի նշանակմամբ ուժեղացնում է Գասպարյանի խաղաքարտերը, թե՞ Սերժ Սարգսյանն ապրիլին, այնուամենայնիվ, հեռանում է` իր հետ տանելով նաև Վլադիմիր Գասպարյանին: Եթե իրադարձությունների զարգացումը դիտարկում ենք այս համատեքստում, ապա Օսիկյանը վերադառնում է ոստիկանություն` առաջիկա ամիսներին այն ղեկավարելու առաքելությամբ: Ի դեպ, չի բացառվում, որ Սերժ Սարգսյանը Վլադիմիր Գասպարյանին հրաժեշտ տա նույնիսկ այն պարագայում, եթե զբաղեցնի վարչապետի պաշտոնը: Նույնիսկ այդ պարագայում Սերժ Սարգսյանի համար բացվում է իշխանության նոր էջ` նոր առաքելությամբ ու կադրերով:
