Տորոնտոյի քաղաքապետ Ռոբ Ֆորդը ներողություն է խնդրել իր հակառակորդին սպանելու սպառնալիքների համար: Այս մասին հայտնում է The Toronto Star-ը: Պարբերականի կայքը հրապարակել է տեսագրությունը, որում քաղաքապետը ոչ պատշաճ բառապաշարի կիրառմամբ սպառնում է կտրել մի մարդու կոկորդը, որը նրան ու նրա եղբայրներին անվանել է գողեր ու ստախոսներ: Ենթադրաբար, տեսագրությունն արվել է ընթացիկ տարվա օգոստոսին:
Այն բանից հետո, երբ տեսագրությունը հայտնվել է համացանցում, Ֆորդը հրապարակավ ներողություն է խնդրել՝ ասելով, որ ոգելից խմիչքի ազդեցության տակ է եղել: Նա նշել է, որ սխալներ է գործել, իսկ թե կոնկրետ ինչով է պայմանավորված եղել ագրեսիայի նոպան, նա այդպես էլ չի բացատրել:
Մինչ տեսանյութի հրապարակումը Ֆորդն ու նրա շրջապատի մարդիկ հրաժարվել էին մեկնաբանություններից: The Toronto Star-ն այն գնել էր անանուն աղբյուրից 5000 դոլարով:
