Adobe ընկերության ներքին ցանցերի վրա իրականացված ցանցահենային հարձակումից հետո համացանցում հայտնաբերվել են նրա 152 մլն օգտատերերի մասին տվյալներ: Ինչպես հայտնում է Reuters գործակալությունը, այդ մասին հայտարարել են համակարգչային անվտանգությամբ զբաղվող LastPass ընկերության փորձագետները:
Հարձակումն Adobe-ի ցանցերի վրա կատարվել էր հոկտեմբերի 3-ին: Սկզբում հաղորդվել էր, որ միջադեպի հետևանքով չարագործները կարողացել են հասանելիություն ստանալ 2.9 մլն օգտատերերի մասին տեղեկատվությանը: Այնուհետև հարձակման հետևանքով տուժածների թիվը հասել էր 38 միլիոնի:
LastPass-ում հաստատում են, որ օգտատերերի մասին տեղեկությունները տեղադրված են կիբերհանցագործների ընդհատակյա կայքում:
Adobe-ում հաստատել են, որ LastPass-ի աշխատակիցներին իսկապես հաջողվել է ընկերության տվյալների բազայից գտնել գողացված տեղեկությունը: Ընկերությունում նշել են, որ վաղ է ասել, թե 152 մլն օգտահաշիվներ վտանգված են: 25 միլիոնի օգտահաշիվների դեպքում նշված է եղել սխալ էլեկտրոնային հասցե, իսկ 18 միլիոնի դեպքում՝ սխալ գաղտնաբառ:
