Թռչնագրիպը, վարակելով իրանական թռչնաբուծական ֆերմաները, ստեղծել է նոր մարտահրավեր՝ սպառնալով թռչնամսի արտադրությանը ողջ երկրում։ Այս մասին հայտնում է IRNA գործակալությունը։
«Եթե վիրուսը շարունակի տարածվել բրոյլեր-ճտերի շրջանում, դա երկրի մասշտաբով ազդեցություն կունենա մսի արտադրության վրա, քանի որ ճտերը կարևոր մասնաբաժին ունեն իրանցների կողմից մսի սպառման մեջ»,-ասել է Թեհրանի առևտրի, արդյունաբերության, հանքերի և գյուղատնտեսության, ջրամատակարարման և սննդի արդյունաբերության պալատի փոխնախագահ Մեհդի Մասումի-Էսֆահանին։
Իրանում հավի մսի սպառումն անձի հաշվով կազմում է տարեկան 26-27 կգ, մինչդեռ աշխարհում միջին ցուցանիշը 13-15 կգ է։
Հիվանդության բռնկման պատճառով փակվել են ավելի քան 300 ֆերմաներ, իսկ մնացած արտադրական միավորներն աշխատում են ցածր հզորությամբ և ենթարկված են փակվելու ռիսկին։ Այդ ձեռնարկություններում աշխատում է միջինը 20-25 մարդ։
Պաշտոնյայի խոսքով՝ ընթացիկ ֆինանսական տարվա սկզբից (սկսվել է 2017-ի մարտի 21-ից) իրանական ֆերմաներից խոտանվել է 20 մլն հավ (մոտ 30 տոկոս) և 1 մլն բրոյլեր-ճուտ (10 տոկոս)։
