Արարատի մարզի Մասիս քաղաքի ԲՀԿ-ական պատգամավոր Տիգրան Ստեփանյանը, ով մասնակցում է Արարատի քաղաքապետի ԲՀԿ թեկնածուի քարոզարշավին, այսօր «Առաջին լրատվական»-ին ասաց, որ ԲՀԿ-ն Արարատում վաղը անցկացնելու է բակային հանդիպում, և այն արտոնված է: Նշենք, որ մամուլի տեղեկություններով՝ վաղը նույն տեղում նույն ժամին պետք է հրավիրվեին և՛ ԲՀԿ-ի, և՛ ՀՀԿ-ի միտինգները, և որ ԲՀԿ-ի միտինգին մասնակցելու է անձամբ Գագիկ Ծառուկյանը՝ չնայած Արարատի քաղաքապետարանը մերժել է ԲՀԿ-ի հայտը, քանի որ ՀՀԿ-ն ավելի վաղ է դիմել: Ծառուկյանը, ըստ մամուլի տեղեկությունների, հայտարարել է, որ հանրահավաքը անելու են. «Կգնանք, կտեսնենք, կհաղթենք»:
Ինչպես հայտնի է, ընտրությունը կայանալու է նոյեմբերի 10-ին և յուրահատուկ է նրանով, որ անզիջում պայքար է ընթանում ՀՀԿ-ի ու ԲՀԿ-ի միջև: Ներկայացնում ենք մեր զրույցը արարատցի ԲՀԿ-ական պատգամավոր Տիգրան Ստեփանյանի հետ:
– Պարոն Ստեփանյան, վաղը Արարատում սպասվում է թեժ ընտրապայքար, փաստորեն նույն վայրում հանրահավաք են անելու և ՀՀԿ-ն, և ԲՀԿ-ն, սակայն Արարատի քաղաքապետարանը չի արտոնել ԲՀԿ-ի հանրահավաքը…
– Իսկ ո՞վ ասեց՝ արտոնված չի: Արգելված չի մեր հանդիպումը, մենք բակային հանդիպում ենք կազմակերպում:
– Նույն վայրո՞ւմ:
– Ոչ, նույն վայրում չէ, տարբեր տեղերում:
– Սակայն, ըստ մամուլի, Գագիկ Ծառուկյանն ասել է, որ հանրահավաքը կայանալու է հենց նույն վայրում:
– Ոչ: Բակային հանդիպում է մերը և արտոնված է:
– Սա նշանակում է՝ ԲՀԿ-ն հրաժարվե՞ց Արարատի հրապարակում իր հանրահավաքն անելու ծրագրից:
– Այդ ժամին իրանք են, հանրապետականն ա անում:
– Իսկ Դուք ի՞նչ անկնալիքներ ունեք Արարատի քաղաքապետի ընտրություններից:
– Ամսի 11-ին կերևա:
– Պարոն Ստեփանյան, Ձեր թեկնածուի հասցեին մեղադրանքներ են հնչում, որ մարդկանց հանում են ցեմենտի գործարանից՝ ՀՀԿ-ին հարելու համար;
– Նման բաներ չեն եղել: Ոչ ոք չի կարող ասել, որ իրեն հանել են:
– Արարատի մարզպետն է ասել ԱԺ-ում և կոնկրետ շեշտել է, որ նման երկու դիմում ունեն մարզպետարանում:
– Նման բան չի եղել: Կարող է մեկը նորմալ չի աշխատում, դուրս է եկել, կամ հեռացրել են: Դա կապված չի ընտրությունների հետ:
– Սա նշանակում է՝ ԲՀԿ-ն նահանջո՞ւմ է Արարատում, եթե հրաժարվում է այդ վայրում հանրահավաք անցկացնել:
– Ինչի՞ ա նահանջում: Հանրապետականն իրան ա վերցրել տեղը, մենք էլ կողքն ենք անում, ի՞նչ տարբերություն: Նույն հրապարակի տարածքն ա:
– Իսկ ինչպե՞ս եք գնահատում, որ Արարատի քաղաքապետարանը մերժել է ԲՀԿ-ի հայտը:
– Որովհետև նույն ժամին իրանք են անում, ոչ մի խնդիր չկա, ամեն ինչ նորմալ ա:
– Քարոզարշավն այս պահին ինչպե՞ս եք գնահատում:
– Շատ բարձր:
– Մամուլում տեղեկություններ կան, որ Արարատի մարզպետը բյուջետային աշխատողներից պահանջում է, որ ընտրեն ՀՀԿ թեկնածուին, նման բողոքներ Դուք ստանո՞ւմ եք:
– Ես լսել եմ, որ նման բան եղել ա:
Լուսանկարը՝ PanARMENIAN Photo-ի
