Կառավարությունը հավանություն կտա ՊԵԿ-ի մաքսային վարչարարության ռազմավարության 2013-2014 թվականների ծրագրին: Այդ ծրագրով նախ կշարունակվեն «Թվիննինգ» ծրագրով կատարված համեմատական վերլուծության հիման վրա պլանավորված և ընթացքի մեջ գտնվող օրենսդրական փոփոխություները: Ծրագրում նշվում է, որ դրանք ուղղված են Հայաստանի մաքսային համակարգի զարգացմանը և համադրելի են ոչ թե Եվրապական, այլ արդեն Եվրասիական մաքսային միության շրջանակներում Հայաստանի ստանձնած պարտավորությունների հետ : Այս փոփոխությունները կսկսվեն 2014թ.-ի առաջին կիսամյակում:
Հայաստանի մաքսային օրենսդրության և Եվրասիական մաքսային միության օրենսդրության` դրույթների տարբերությունները կվերլուծեն և կգնահատեն մինչև 2014թ.-ի երրորդ եռամսյակ, իսկ Հայաստանի Եվրասիական մաքսային միությանը անդամակցությունից բխող մաքսային ընթացակարգերի ներդաշնակեցումն ու միասնական փաստաթղթերի կիրառման հնարավորության ուսումնասիրությունը կկատարվի եկող տարվա չորրորդ եռամսյակում: Համենայնդեպս, այդպես է նշված ծրագրում:
Որ մեթոդով է որոշվում ապրանքի, օրինակ` մեքենայի, մաքսային արժեքը: Այս հարցին էլ ՊԵԿ-ը կպատասխանի եկող տարի: Ծրագրով նախատեսում են մշակել և հրապարակել մաքսային արժեքի որոշման մեթոդների պատշաճ կիրառման կանոններ: Հետաքրքիր է, որ այդ կանոնները նախատեսված կլինեն ոչ միայն տնտեսվարող սուբյեկտների, այլ նաև մաքսային ծառայողների համար:
ՊԵԿ-ը կփորձի կրճատել նաև մաքային ձևակերպումների գործընթացի փաստաթղթաշրջանառությունը և կշարունակի մի շարք ծրագրեր, որոնք այժմ էլ ընթաացքի մեջ են: Ամբողջ ծրագիրը կհաստատվի կառավարության առաջիկա նիստին:
