Իրական ընդդիմությունն իր ակտիվությունը չի կորցրել: Այս մասին ասաց ՀԱԿ խմբակցության ղեկավար Լևոն Զուրաբյանը՝ լրագրողների հետ հանդիպման ժամանակ պատասխանելով հարցին, թե երեկ Մաշտոցի պողոտայում տեղի ունեցած դեպքերն իրական ընդդիմության պասիվության արդյունք չե՞ն արդյոք: Բանախոսը նշեց, որ ՀԱԿ-ը 2007թ. մի համաժողովրդական շարժում է ստեղծել, որը 5 տարի շարունակ պայքարում է: Ըստ նրա՝ այս ժամանակահատվածում եղել են ակտիվության տարբեր աստիճաններ:
«Եթե հիշում եք 2009թ., 2010թ., 2012թ. ունեցել ենք ժամանակաշրջաններ, երբ ակտիվ հանրահավաքներ չեն եղել, ընդհուպ մինչև 6 ամիս, բայց դա չի խանգարել, որ քաղաքական գործընթացները չխաթարվեն: Հզոր հանրահավաքներ են եղել, ինչպիսին 2011թ. մարտի 17-ի հանրահավաքը, որը ամենաբազմամարդ հանրահավաքներից մեկն էր ՀՀ պատմության մեջ, բայց դրանից առաջ մեզ մեղադրում էին ակտիվության պակասի համար:
Մենք վատ ենք սովորեցրել մարդկանց. 2011թ. 20 հանրահավաք ենք անցկացրել, 8-օրյա շուրջօրյա հանրահավաք: Ես համարում եմ, որ շատ ակտիվ ենք, հանրահավաքներ լինելու են, նոր ալիք է լինելու հանրահավաքային, որովհետև, ինչպես ճիշտ նշել է Լևոն Տեր-Պետրոսյանն իր հոդվածում, Սերժ Սարգսյանն այլևս որևէ քայլ չունի»,- ասաց Լևոն Զուրաբյանը:
Հարցին, թե սա կարո՞ղ է առիթ լինել քաղաքական ակտիվության համար, Զուրաբյանը պատասխանեց, որ ՀԱԿ-ը երբեք առիթ օգտագործող չի եղել:
«Եթե վերլուծեք 2007թ. 2013թ. ընկած շրջանը, չեք տեսնի, որ մենք առիթ օգտագործենք, հանրահավաք նշանակենք, քանի որ ինչ-որ բան է պատահել: Մեր հանրահավաքները հստակ քաղաքական գործընթացների հետ են կապված եղել: Ճշգրիտ ասել, որ այսօր պատրաստ ենք դուրս գալ հանրահավաքի, չեմ կարող, բայց մենք մեր ձեռքը զարգացումների պուլտի վրա ենք պահում»,- ասաց Լևոն Զուրաբյանը:
Լուսանկարը` PanARMENIAN Photo-ի
