«Երեկ Մաշտոցի պողոտայում տեղի ունեցած դեպքերը ժողովրդի անելանելիության վիճակի արտահայտումն են»,- լրագրողների հետ հանդիպման ժամանակ Մաշտոցի պողոտայում տեղի ունեցած իրադարձությունների մասին այսօր ասացին «Հայ ազգային կոնգրես» խմբակցության ղեկավար Լևոն Զուրաբյանը և ՀԱԿ ներկայացուցիչ Վահագն Խաչատրյանը:
Լևոն Զուրաբյանն ասաց, որ շատ բան չկա ասելու, ամեն ինչ նկարահանված է, բոլորը տեսել են երեկ տեղի ունեցած իրադարձությունների տեսանյութերը: Նրա գնահատմամբ՝ մի բան է ակնհայտ, որ այս ռեժիմը երկիրը հասցրել է անելանելիության վիճակի, շատերն այլևս ուրիշ ելք չեն տեսնում, քան ամենածայրահեղ, նույնիսկ ապօրինի միջոցներով այս ռեժիմից ազատվելը:
Նա նշեց, որ ցավալի է, բայց փաստ, և այստեղ պետք է մեղադրել Սերժ Սարգսյանի ղեկավարած իշխանությանը: Երբ կեղծվում են ընտրությունները, փակվում է ընտրության միջոցով հարց լուծելու հնարավորությունը, երբ փակվում են մրցակցելու բոլոր ելքերը, չպետք է զարմանալ, որ կլինեն մարդիկ, որոնք համարելով, որ օրինական ձևերով հարցեր լուծելու բոլոր ճանապարհները փակված են, կդիմեն ծայրահեղ քայլերի: Լևոն Զուրաբյանն ասաց, որ սա ռեժիմի գործողությունների լավագույն բնորոշումն է:
Նման տեսակետ հայտնեց նաև ՀԱԿ ներկայացուցիչ, տնտեսագետ Վահագն Խաչատրյանը՝ նշելով, որ իշխանությունը ժողովրդին հասցրել է ծայրահեղ վիճակի, որ ժողովուրդն ամեն ինչի պատրաստ է: Նա ասաց, որ ընտրությունների հնարավորությունից զրկվել ենք, քաղաքապետի ընտրություններից հետո Փակ շուկա, տրասնպորտի թանկացման հարցեր…
«Տեսնում ենք, որ որևէ քաղաքական հնարավորություն չի տրվում քաղաքացուն իրավական դաշտում իր իրավունքները պաշտպանելու, այսինքն՝ մենք ծայրահեղ լարված մթնոլորտում ենք ապրում, և երեկվա դեպքերը գուցե դառնան սովորական երևույթ: Մենք առաջարկել ենք ավելի քաղաքակիրթ, օրենքով, սահմանադրական ճանապարհ, որն իշխանությունը չի ուզում»,- նման տեսակետ հայտնեց Վահագն Խաչատրյանը:
Գնահատելով ՀՀ ոստիկանության գործողությունները երեկվա դեպքերի ժամանակ՝ Լևոն Զուրաբյանն ասաց, որ բերման էին ենթարկվել բազմաթիվ անմեղ մարդիկ, ընդ որում՝ թիրախավորել էին այն ակտիվիստներին, ովքեր վերջին շրջանում ակտիվ են եղել ակցիաների ժամանակ: Նա տեղեկացրեց, որ ՀԱԿ պատգամավոր Արամ Մանուկյանի հետ երեկոյան եղել է ՀՀ ոստիկանությունում՝ փորձելով պաշտպանել բերման ենթարկված անմեղ քաղաքացիների շահերը:
«Մենք ՀՀ ոստիկանապետի հետ հանդիպման ժամանակ 11 մարդու ցուցակ ենք ներկայացրել նրան: Կոնկրետ այդ մարդկանց վերաբերյալ ճշտել էինք, որ ուղղակի տարել են առանց որևէ հիմնավորման, ուստի անհատ առ անհատ բոլորի գործերով անցանք: Իմ ունեցած տեղեկություններով՝ նրանց բոլորին բաց են թողել, անգամ եթե պատրաստվել էին այլ տեսակի նյութեր: Այդ հարցերը լուծվեցին, և մենք հստակ դրեցինք, որ չենք կարող հանդուրժել ձերբակալություն, եթե չկա 100 տոկոսանոց ապացույց, որ նա կատարել է հակաիրավական գործողություն: Համատեղ ջանքերով հասանք այդ մարդկանց ազատ արձակմանը»,- ասաց Լևոն Զուրաբյանը:
Լուսանկարը՝ Photolure-ի
