Ռուսաստանի կառավարության քննադատ, շախմատի աշխարհի նախկին չեմպիոն Գարի Կասպարովը դիմել է Լատվիայի քաղաքական գործիչներին՝ իրեն այդ երկրի քաղաքացիություն տրամադրելու խնդրանքով՝ նշելով, որ Լատվիայի քաղաքացիություն ունենալը կնպաստի Ռուսաստանում քաղաքական իր գործունեության իրականացմանը: Այս մասին հաղորդում է «Ամերիկայի ձայնը»:
Լատվիայի քաղաքական գործիչներին ուղղված նամակում Կասպարովը նշել է, որ Լատվիայի քաղաքացիությունը «հնարավորություն կընձեռի աշխատել Ռուսաստանում և աշխարհի այն երկրներում, որտեղ խախտվում են քաղաքացիական իրավունքներն ու ոտնահարվում են ժողովրդավարական նորմերը»:
«Լատվիայի ցանկացած քաղաքացի ունի իր կարծիքն ազատ արտահայտելու, քաղաքական գործընթացին մասնակցելու և անօրինական հետապնդումներից չվախենալու իրավունք»,- գրել է Կասպարովն իր նամակում, որտեղ նշել է նաև, որ ցանկանում է պահպանել Ռուսաստանի քաղաքացիությունը:
Կասպարովը լատվիերեն գրված իր նամակը հասցեագրել է երկրի խորհրդարանի քաղաքական բոլոր կուսակցություններին և անկախ խորհրդարանականներին՝ բացառությամբ «Ներդաշնակ կենտրոն» կուսակցության: Այս մասին հայտնել է Լատվիայի խորհրդարանում կուսակցությունը ներկայացնող Անդրեյս Կլեմենտևսը:
«Ներդաշնակ կենտրոն» կուսակցությունը 2009 թվականին համագործակցության համաձայնագիր է ստորագրել Ռուսաստանի նախագահ Վլադիմիր Պուտինի հիմնադրած «Միասնական Ռուսաստան» կուսակցության հետ:
