Սաուդյան Արաբիայի բնակիչներն իրենք պետք է որոշեն՝ երբ թույլ տալ կանանց ստանալ վարորդական իրավունք և ավտոմեքենա վարել: Ինչպես հաղորդում է Interfax-ը, այս մասին հայտարարել է ԱՄՆ պետքարտուղար Ջոն Քերին:
«Գաղտնիք չէ, որ ԱՄՆ-ը բոլոր մարդկանց հավասարության կողմնակից է՝ անկախ սեռից, ռասայական պատկանելությունից կամ մասնագիտությունից: Սակայն Դա Սաուդյան Արաբիայի գործն է՝ որոշում կայացնել հասարակական կառուցվածքի մասին և ընտրել ճիշտ պահը»,- ասել է նա Էր-Ռիադում մամուլի ասուլիսի ժամանակ:
Ավելի վաղ ԱՄՆ պետդեպարտամենտի ներկայացուցիչ Ջենիֆեր Պսակին հայտարարել է, որ Վաշինգտոնն աջակցում է Սաուդյան Արաբիայի կանանց՝ մեքենա վարելու իրավունքը:
Ներկայումս Սաուդյան Արաբիան աշխարհում միակ երկիրն է, որտեղ կանանց արգելվում է մեքենա վարել:
