Ռումինիայում ռազմաբազա հիմնելը ցույց է տալիս, որ ԱՄՆ-ը չի ուզում, որ Սև ծովի ակվատորիան մնա բացառապես Ռուսաստանի և Թուրքիայի վերահսկողության ներքո: Այսօր տեղի ունեցած մամուլի ասուլիսի ժամանակ նման տեսակետ հայտնեց Քաղաքական և միջազգային հետազոտությունների հայկական կենտրոնի փորձագետ Ռուբեն Մեհրաբյանը:
«Երկրորդ կարևորագույն իրադարձությունը 1945 թվականից հետո ամենամեծ զորավարժությունն էր Բալթիկ ծովում, որին մասնակցում էին վեց հազար զինծառայող և ռազմական բազմաթիվ ստորաբաժանումներ: Սա ցույց է տալիս, որ Արևմուտքի կողմից Ռուսաստանի հանդեպ վստահությունը նվազել է»,- ասաց նա:
Ռուբեն Մեհրաբյանի խոսքով՝ Վիլնյուսյան գագաթաժողովից հետո, երբ Ուկրաինան կներգրավվի ԵՄ-ի հետ ազատ առևտրի գոտում, հետխորհրդային տարածքում գործ կունենանք ակնհայտորեն այլ իրավիճակի հետ:
«Խիստ հավանական եմ համարում, որ գուցե ԵՄ կողմից Վրաստանի և Մոլդովայի` ԵՄ անդամության վերաբերյալ փաստաթղթի նախաստորագրումից ստորագրում ընկած ժամկետը կրճատվի: Սա Հայաստանի իշխանությունների համար մանևրելու մեծ դաշտ է բացում: Հայաստանը ներմուծումից կախված երկիր է, բայց հանուն ո՞ր շահի պետք է նա ընդառաջի Ռուսաստանին: Ժամանակն է, որ ստեղծված իրավիճկը վերաիմաստավորի, թեև Հայաստանում չկա նման քայլի ընդունակ գոնե մեկ ուժ: Վաղուց ժամանակն է ստեղծել հասարակական-քաղաքական մի ուժ, որը կստանձնի բարձր պարտավորություններ: Հայաստանի հույսը հասարակությունն է և հատկապես երիտասարդությունը»,- ասաց փորձագետը:
Ռուբեն Մեհրաբյանի խոսքով՝ Հայաստանը պետք է անի ամեն բան, ինչն իրեն ներքին ամրության պաշար կտա: «Մենք այսօր գտնվում ենք հսկայական ճնշումների ներքո` թե՛ Ռուսաստանի, թե՛ Արևմուտքի կողմից: Այդ ճնշումները երկիրը զրոյացնում են միջազգային հարաբերությունների թատերաբեմում, ինչը վտանգավոր և վնասակար է մեզ համար: Հասարակությունը պետք է ընդդիմադիր կամ իշխանական քեռիներին ստիպի որոշակիացնել առաջընթացի ուղին: Քանի մենք քնած ենք, ժամանակն աշխատում է միմիայն ի վնաս մեզ: Ահագնացող մարտահրավերները պետք է մեզ դուրս բերեն նիրհից: Դրա համար էլ մարդիկ սկսել են խոսել նոր ուժի անհրաժեշտության մասին»,- ասաց փորձագետը:
Ռուբեն Մեհրաբյանի համոզմամբ՝ մեր այսօրվա պատմության պատմիչներն ու գրողները մենք ինքներս ենք և հայոց պատմության տխուր դասերը չկրկնելու համար պետք է նախաձեռնողականություն ցուցաբերենք:
