Ուրբաթ օրը Դոնալդ Թրամփը կանցնի ԱՄՆ նախագահի պաշտոնում իր առաջին բուժզննությունը։ Այն կանցկացվի Վաշինգտոնից ոչ հեռու գտնվող Walter Reed զինվորական հոսպիտալում։ Նշվում է, որ ԱՄՆ նախագահի բուժզննման արդյունքները կհրապարակվեն առաջին անգամ։ Նախկինում նախագահների առողջական վիճակի մասին տվյալները չեն հրապարակվել։
Չնայած նախագահի քննադատների մոտ նրա հոգեկան անկայունության մասին աճող ենթադրություններին, Սպիտակ տան ղեկավարը հոգեբույժի մոտ զննություն չի անցնի։ Բժիշկները կստուգեն նրա քաշը, զարկերակային ճնշումը և խոլեստերինի մակարդակը։
Թրամփի հնարավոր հոգեկան խնդիրների մասին զրույցներն առաջ են եկել լրագրող Մայքլ Վուլֆի՝ «Կրակ և ցասում. Թրամփի Սպիտակ տան ներսում» գրքից, որը պարունակում է 200 հարցազրույց Սպիտակ տան աշխատակիցների հետ։ Վուլֆը հաստատում է, որ նախագահի շրջապատը նրան հիմար է անվանում և հայտարարում, որ նա ի վիճակի չէ ընկալելու վերլուծական տեղեկատվությունը, հատկապես գրավոր տեսքով։
Թրամփն ԱՄՆ առաջին նախագահը չէ, որի հոգեկան առողջությունը կասկածներ է առաջացնում։ Նման ենթադրություններ են հնչեցվել նաև կապված Ռոնալդ Ռեյգանի հետ, ով կառավարել է 1981-89թթ և թողել պաշտոնը 78 տարեկանում։ Ավելի ուշ պարզվել էր, որ ենթադրություններն անհիմն չէին. դեռևս պաշտոնում գտնվելու ժամանակ նա տառապել է Ալցհեյմերի հիվանդությամբ։
