Ամանորյա եղևնիների կրկնակի օգտագործման հարցը ցավոտ թեմաներից է ամբողջ աշխարհում: Ոմանք ամաչելով աղբանոց են նետում դեռևս կանաչ գեղեցկուհուն, ոմանք որպես կեր հանձնում են կենդանիներին, ոմանք ընդհանրապես հրաժարվել են բնական եղևնիներից: Իսկ այ Եվրոպայում այս խնդիրը վաղուց լուծվել է. ծառերը վերածվում են «ջերմության» և հոսանքի:
Օրինակ, Ավստրիայում, արդեն գրեթե երեսուն տարի է ինչ ամանորյա եղևնիներն ընդունվում են հատուկ կետերում: Միայն Վիեննայում նման 530 ընդունման կետ կա: Նրանք, ովքեր կփորձեն եղևնին հենց այնպես աղբանոց նետել, 50 եվրոյով կտուգանվեն:
Տոներից հետո Վիեննայի բնակիչները մոտ 200 հազար եղևնի են հանձնում, ինչը մոտ 700 տոննա է կազմում: Այս ծառերը ուղարկվում են էլեկտրակայաններ, որտեղ դրանք այրվում և վերածվում են ջերմության և էլեկտրական հոսանքի:
