Կենտրոն և Նորք-Մարաշ վարչական շրջանների ընդհանուր իրավասության դատարանում Արշակ Վարդանյանի նախագահությամբ պետք է սկսվեր կուբացի երկու կանանց՝ մայր և դուստր Բառբառա Լիմոնտա Մեգռետիի և Լեյինե Գոմես Լիմոնտայի գործով դատական քննությունը:
Կուբացի մայր և դուստրը Հայաստանում մեղադրվում են խարդախության եղանակով իրենց երեք համերկրացիների առանձնապես խոշոր չափերի գույքը հափշտակելու համար՝ երկու դրվագով՝ ՀՀ քրեական օրենսգրքի 178 հոդվածի 3-րդ մասի 1-ին կե տով:
Այս գործով ևս մեկ անձի՝ Բառբառայի դստեր՝ Լեյինեի ամուսնու նկատմամբ հայտարարվել էր հետախուզում: Վերջինս հայտնաբերվել է ՌԴ տարածքում… Գործի նրա մասն անջատված է առանձին վարույթում:
Ըստ մեղադրանքի՝ մայր և դուստր Բառբառան ու Լեյինեն նախնական համաձայնությամբ Հայաստանի տարածքով ԱՄՆ կուբացիների մեկնումը, մշտական բնակություն հաստատելը կազմակերպելու պատրվակով են խարդախության եղանակով կատարել առանձնապես խոշոր չափերի գույքի հափշտակումը:
Երևանում գտնվող կուբացի Ռոդրիգես Գոմեսը 2016 թվականին գրավոր հաղորդում էր ներկայացրել ՀՀ իրավապահ մարմիններին, որ իր ընտանիքի վեց անդամների՝ ԱՄՆ-ում մշտական բնակության հարցը կազմակերպելու նպատակով իր համերկրացիները իրենից վերցրել են առանձնապես խոշոր չափերի գումար, բայց մեկնումը Հայաստանից այդպես էլ չեն կազմակեպել, գումարն էլ չեն վերադարձրել:
Գործի նախաքննությունն իրականացվել է ՀՀ քննչական կոմիտեի ՀԿԳ քննության գլխավոր վարչությունում:
Նախնական քննությամբ պարզվել է, որ 1962 թվականին ծնված կուբացի կինը՝ Բառբառա Լիմոնտա Մեգռետին, մշտական բնակության նպատակով ԱՄՆ մեկնելու ցանկություն ունեցող իր համերկրացիներին խաբեությամբ համոզել է, թե կարող է կազմակերպել նրանց մեկնումը Կուբայից ԱՄՆ… Հայաստանի տարածքով…
Ձեռք բերված պայմանավորվածության համաձայն՝ Գոմեսի ընտանիքի վեց անդամները Հավանա-Մոսկվա-Երևան չվերթով ժամանել են Հայաստան, որտեղ նրանց դիմավորել են Բառբառայի դուստրն ու վերջինիս ամուսինը՝ Յասսեռը:
Ժամանած կուբացիներին ապահովել են ժամանակավոր ապրելատեղով՝ խոստանալով կարճ ժամանակում կազմակերպել նրանց մեկնումը ԱՄՆ:
Անհրաժեշտ փաստաթղթերը ձևակերպելու համար Գոմեսներից վերցրել են առանձնապես խոշոր չափերի գումար՝ 36 հազար 300 դոլար և 2 հազար եվրո: Այդ գումարները Բառբառան, նրա դուստրն ու փեսան, ըստ մեղադրանքի, հափշտակել են, Գոմեսները ԱՄՆ մեկնելու թույլտվություն այդպես էլ չեն ստացել, նրանց գումարը չի վերադարձվել:
Գործով կատարված քննությամբ պարզվել է նաև, որ Բառբառայի, նրա դստեր ու փեսայի գործողություններից տուժել է կուբացի ևս մի ընտանիք, որի մշտական բնակության մեկնումը Կուբայից Ամերիկա՝ «չերեզ Հայաստան»՝ նույն մեխանիզմով իրականացնելու արդյունքում հափշտակվել է 24 հազար 920 դոլար:
Ամբաստանյալ կանանցից՝ մայրը՝ Բառբառա Մեգռետին, գտնվում է կալանքի տակ:
Դուստրը՝ Լեյինեն, ում խնամքին անչափահաս երեխա կա, ազատության մեջ է, նրա խափանման միջոցը ստորագրությունն է չհեռանալու մասին:
Դատական նիստին Աբովյան ՔԿՀ-ից ներկայացվել էր Բառբառան՝ նիհարիկ, ձիգ, կուբայական արտաքինով, ժպտադեմ:
Դուստրը ներկայացել էր փոքրիկ որդու հետ՝ երկուսն էլ կուբայական արտաքինով:
Փոքրիկ տղան հրաժարվեց տատիկի հետ համբուրվելուց, մայր ու աղջիկ ողջագուրվեցին…
Դատական նիստին, սակայն, չէին ներկայացել մեղադրողը, երեք տուժողները և, որ ամենակարևորն է, չէր ապահովվել թարգմանչի ներկայությունը: Այնպես որ՝ թե ինչ տեղի ունեցավ կարճատև նիստի ընթացքում, ամբաստանյալ կանայք հասկացան կոտրատված անգլերենով, որով նրանց փորձեցին կատարվածի մասին իրազեկել պաշտպաններն ու դատավորը:
Դատարանը որոշեց, որ նման պայմաններում դատական նիստը պետք է հետաձգել:
Ըստ դատարանի ունեցած տեղեկության՝ տուժողներից երկուսը Հայաստանում չեն: Նրանց վերաբերյալ հարցում կկատարվի ՍԷԿՏ համակարգով:
Մյուս տուժողը՝ Պաուլա Ալպախոն, կծանուցվի ևս մեկ անգամ: Դատարանը միջոցներ կձեռնարկի, որ հաջորդ նիստին ներկայանա իսպաներենից հայերեն, հայերենից իսպաներեն թարգմանող թարգմանիչ:
Հաջորդ նիստը տեղի կունանա փետրվարի 9-ին:
