«Կարծում եմ, որ մոտ օրերս ձմեռն իր խոսքը կասի, այլապես եթե եղանակն այսպես պահպանվի, կատաստրոֆա կլինի գյուղատնտեսության համար։ Եղանակը կտաքանա, երաշտ կլինի»,- «Առաջին լրատվական»-ի հետ զրույցում ասաց «Ագրարագյուղացիական միավորում» ՀԿ նախագահ Հրաչ Բերբերյանը։
Նրա խոսքով՝ այս օրերին եթե ձյուն տեղա, և ձյան շերտը ծածկի աշնանացան ցորենը, ապա այդ մասով խնդիրներ չեն առաջանա։ «Այսօրվա՝ հունվարի 4-ի դրությամբ ասել, որ մենք ինչ-որ լուրջ վտանգ ունենք, չենք կարող։ Ճիշտ է, տեղումները սակավ են, դա մեզ անհանգստացնում է, բայց, կրկնում եմ, տեղումներ դեռ կլինեն։ Բացի այդ, լեռնային շրջաններում մենք ձյան շերտ ունենք, իսկ հունվարի վերջին արդեն նոր կունենանք իրական պատկեր։ Բայց նշեմ, որ եթե այսպես շարունակվի, ապա մենք շատ վատ պատկեր կունենանք։ Կարող են ծառերը բողբոջակալել, ծաղկել, ապա ցրտահարում լինի։ Եթե ձյան շերտը չծածկի աշնանացան ցորենը, ապա դա ևս կարող է ցրտահարվել։ Վտանգները շատ լուրջ կլինեն, բայց, կրկնում եմ, ես հավատացած եմ, որ բնությունը իր խոսքը կասի, և մենք բնականոն կերպով կանցնենք ձմեռային եղանակի»,- նշեց Բերբերյանը՝ հավելելով, որ այսօրվա դրությամբ դեռ ծառերի բողբոջակալում չի սկսվել։ Հնարավոր է Մեղրիի տարածաշրջանում նման դեպքեր հանդիպեն, բայց դա, մեր զրուցակցի խոսքով, չի կարող լուրջ ազդեցություն թողնել գյուղատնտեսության, արտադրության վրա։
Բերբերյանը վերջին շրջանում այսպիսի տաք ձմեռ չի հիշում։ Մեկ տարի է հիշում՝ 90-ականների սկզբին, բայց այդ ժամանակ էլ գյուղատնտեսության համար որևէ վտանգ չառաջացավ, քանի որ հունվարի կեսից անցում կատարեցինք ձմռան եղանակի։ «Մեզ մոտ հիմնականում ձմեռը սկսվում է հունվարի 10-ից հետո և տևում է մինչև փետրվարի 10-15-ը։ Այնպես որ, ձմեռ դեռ կլինի, տեղումներ կլինեն։ Առաջիկա օրերին ձմեռն իր խոսքը կասի, և մենք գյուղատնտեսությունը չենք կորցնի»,- նշեց Բերբերյանը։
