«Վերջին օրերի կտրվածքով մեկ օրվա ընթացքում սուր շնչառական վարակներով շտապօգնության 52 կանչ է գրանցվել ողջ հանրապետության տարածքում, որից 47-ը եղել է երեխաների շրջանում: Բացի սրանից՝ եղել են նաև շտապօգնության թոքաբորբի կանչեր, որոնցից միայն 1-ն է եղել երեխայի մոտ։ Ինչ վերաբերում է ստացիոնար դիմելիությանը, ապա, այո, կան հիվանդներ, ովքեր հոսպիտալացվել են ստացիոնար հիվանդանոցներ. դրանց հիմնական բեռը ընկել է Երևանի երեք ստացիոնար հիվանդանոցների վրա՝ «Արաբկիր», «Մուրացան» և «Սուրբ Աստվածամայր» ԲԿ-ներ, ինչը տրամաբանական է, քանի որ այնտեղ հոսպիտալացվում են հենց փոքրիկները, և այս ամբողջ հիվանդացության դիմելիության մեջ գրեթե 96 տոկոսը կազմում են 0-ից մինչև 5 տարեկան երեխաները»,- «Առաջին լրատվական»-ի հետ զրույցում նշեց ՀՀ առողջապահության նախարարության հատուկ վտանգավոր և օդակաթիլային վարակների համաճարակաբանության բաժնի պետ Լիանա Թորոսյանը։
Վերջինիս խոսքով՝ դեռևս նախորդ տարվա նոյեմբերից հանրապետությունում շրջանառվում են գրիպի հարուցիչներ՝ գրիպ B, գրիպ A։
«Գրիպ A-ի H1N1 ենթատեսակի դեպքերը, իհարկե, եզակի են՝ 6 այդպիսի դեպք ենք ունեցել, գրեթե 20 դեպք ունեցել ենք՝ պայմանավորված գրիպ B-ով, և բազմաթիվ այլ դեպքեր ունեցել ենք այլ շնչառական վարակների վիրուսներով պայմանավորված՝ պնևմովիրուսներ, բոկավիրուսներ, ադենովիրուսներ, որոնց նկատմամբ առավել խոցելի են հենց երեխաները: Ունենք հիվանդացություն, ունենք տարիքային կազմ, որը հիմնականում երեխաներն են, և ունենք շրջանառվող հարուցիչներ, որոնք ամփոփելով և համադրելով նախորդ տարվա միևնույն ժամանակահատվածի հետ՝ պետք է ասել, որ այն հիվանդացության մակարդակը, որն այսօր դիտվում է հանրապետությունում, ոչ ահազանգող է, ոչ էլ խուճապ է առաջացնում, այլ օրինաչափ է, որովհետև գրիպը և սուր շնչառական վարակներն ունեն սեզոնային բնույթ և ակտիվանում են մասնավորապես ուշ աշնանը, ձմռանը և շարունակվում են մինչև վաղ գարուն»,- հավելեց Լիանա Թորոսյանը։
Մանրամասները՝ տեսանյութում։
