Կառավարության այսօրվա նիստում ՀՀ ֆինանսների նախարար Վարդան Արամյանը ներկայացրեց «Հայաստանի Հանրապետության հարկային օրենսգրքում լրացում կատարելու մասին» Հայաստանի Հանրապետության օրենքի նախագծի վերաբերյալ Հայաստանի Հանրապետության կառավարության առաջարկության նախագծի մասին։ Նախագիծը ներկայացվել է ԱԺ ՀՀԿ խմբակցության պատգամավոր Միհրան Պողոսյանի կողմից և առաջարկվում է հաշմանդամության կարգ ունեցող անձանց ստացված եկամուտները եկամտային հարկով չհարկել։
Նրա խոսքով՝ պատգամավորի կողմից ներկայացված հիմնական շարժառիթը փաստարկվում է այն հանգամանքով, որ սա խթաններ կստեղծի տնտեսվարողների համար, որպեսզի ավելի շատ հաշմանդամություն ունեցող անձնանց ներգրավեն աշխատանքային հարաբերությունների մեջ։ «Իհարկե, ընդհանուր նկատառումը չնսեմացնելով՝ մենք խնդիր ենք տեսնում, պարոն վարչապետ, առաջինը պետք է հաշվի առնել, որ եկամտային հարկ վճարողն, իրականում, հենց ֆիզիկական անձն է, ոչ թե տնտեսվարողը, և տնտեսվարողը նայում է համընդհանուր ծախսի տեսանկյունից, այսինքն՝ եթե 100 հազար դրամ վճարում է, և եկամտային հարկը թողնվում է հաշմանդամություն ունեցող անձի մոտ, ամեն դեպքում, որևէ ծախսային փոփոխություն տնտեսվարողի մոտ չի առաջացնում, որպեսզի շարժառիթ ստեղծվի, որ նա ավելի շատ հաշմանդամություն ունեցող անձի ներգրավի»,-ասաց Վարդան Արամյանը։
Վարդան Արամյանն առաջարկեց ձեռնպահ մնալ այս օրենքի ընդունումից. Կառավարությունն ընդունեց նախարարի առաջարկը։
