«Ով որ գրել է Դատական օրենսգրքի այդ նախագիծը, թող սկզբից անդրադառնար նրան, թե դատավորները իրենց ինչպես են պահում նիստի ժամանակ։ Իսկ եթե այսպես են վարվում, ապա թող մեզ աջուձախ տուգանեն, իսկ մենք այնպես կանենք. Որ իրենք չեն կարողանա աշխատել։ Թող դրա մասին մտածեն»,-«Առաջին լրատվական»-ի հետ զրույցում ասաց Փաստաբանների պալատի նախկին նախագահ, գործող փաստաբան Ռուբեն Սահակյանը՝ անդրադառնալով Դատական օրենսգրքի նոր նախագծին, որով փաստաբանների նկատմամբ որպես սանկցիա կարող է կիրառվել տուգանք՝ մինչև 100 հազար դրամ։
Նշենք, որ Դատական օրենսգրքի նախագիծն առաջին ընթերցմամբ ընդունվեց նախօրեին բավական բուռն մթնոլորտում: Սակայն այդ բուռն մթնոլորտում քննարկվում էր ոչ թե օրենքի նախագիծը, դրա բովանդակությունը, այլ դրա ընդունման ընթացակարգը: Արդյունքում առանց լուրջ բովանդակային քննարկման այս վիճահարույց նախագիծն առաջին ընթերցմամբ ընդունվեց։
Ռուբեն Սահակյանը համաձայն չէ այն կարծիքների հետ, թե այս օրենքով փորձ կարվի փաստաբաններին վերահսկողության տակ պահել, դատարաններում նրանց ազատությունը սահմանափակելով դարձնել կառավարելի։ «Ես համաձայն չեմ այդ կարծիքի հետ, բայց շատ ու շատ փաստաբաններ կարող են տրվել դրան և վախենան ձայն բարձրացնել։ Ես նկատի չունեմ գոռալը։ Խոսքն իրենց իրավունքների պաշտպանության մասին է։ Պարզունակ խնդիր է. Դատավորը քեզ կարող է ասել նստիր, չեմ թողնում միջնորդություն անես։ Է, հետո, տաս դատավորի գլուխը ջարդես, թե սպասես, որ քեզ ձայնից զրկի, նստեցնի ու 100 հազար էլ տուգանի։ Կրկնում եմ, սկզբից թող իրենց համակարգում կարգուկանոն մտցնեն, նոր մեր՝ փաստաբանների մասին մտածեն»,-ասաց Սահակյանը։
Մեր դիտարկմանը, թե նախկինում երբեք կառավարությունը, իշխանությունները փորձ չեն արել մտնել փաստաբանների իրավասությունների շրջանակ, նրանց իրավունքները և պարտականութունները, գործելաոճը օրենսդրորեն կարգավորել, բայց վերջին շրջանում ակնհայտ նկատվում է այդ միտումը, ՓՊ նախկին նախագահը պատասխանեց.«Այդ իշխանությունը չի փորձում, այլ իշխանության ինչ-որ մի «վինտիկ» որոշել է այդպես մատուցել նախագիծը, ու մատուցեց։ Չգիտեմ ինչու է այդ պաշտոնյայի հիվանդ ուղեղում նման միտք ծնվել, որ կարելի է ինչ որ կերպ սահմանափակել փաստաբանի կարծիք հայտնելու իրավունքը։ Դատարանում չի բացառվում, որ մի փոքր էլ կարող է ձայնդ բարձրանալ, բայց ինչ է նշանակում 100 հազար տուգանել դրա համար և արգելել ասենք միջնորդություն ներկայացնելը։ Բա փաստաբանն ինչ անի՞»,-նշեց մեր զրուցակիցը։
Ռուբեն Սահակյանի խոսքով փաստաբաններն են մեղավոր որ այդ նախագիծը ներկայացվեց և նաև ընդունվեց առաջին ընթերցմամբ։ «Փաստաբաններն են մեղավոր, ընդհանրապես պետք է դադարեցվեր աշխատանքը, որ նոր իմանային ինչ կա։ Օրական մենք հանդիպում ենք տասնյակ հիմարությունների, որոնք կատարվում են դատավորների կողմից։ Իսկական հիմարությունների, որոնք գալիս են օրենքի չիմացությունից»։
ՓՊ նախկին նախագահի կարծիքով միակ տարբերակը տոներից հետո համատարած գործադուլներն են, բայց դա էլ դժվար իրագործելի է, քանի որ փաստաբանների մեծ մասը նախընտրում է համակերպվել վիճակի հետ։ «Առաջ ասում էին դատավորներն են մորթապաշտ, բայց հիմա փաստաբանների մի զգալի զանգված նույնպես լռության է մատնվել, վախենում է ձայն բարձրացնել։ Թե ինչից են վախենում, չգիտեմ։ Բայց վախենալու առիթ չկա, ոչ մեկ չի ստիպում, որ վախենան։ Կազմակերպիչ էլ չկա։ Պետք է կանգնել սեփական իրավունքների պաշտպանության համար։ Սա է ելքը»,-եզրափակեց Ռուբեն Սահակյանը։
Նշեք, որ փաստաբաններին տուգանելու մասին դատական օրենսգրքի նոր նախածը տևական ժամանակ է հրապարակային էր։ Փաստաբանների առանձին խումբ տևական ժամանակ է աղմուկ էր բարձրացրել, քննադատում էր կառավարության այդ մոտեցումը։ ՄԻնչդեռ Փաստաբանների պալատը չէր շտապումհստակ դիրքորոշում հայտնել խնդրի վերաբերյալ։ Բավարարվում էին մեկ-երկու կցկտուր նախադասությամբ։ Նախօրեին միայն, երբ արդեն նախագիծն առաջին ընթերցմամբ ընդունվեց ՓՊ նախագահ Արա Զոհրաբյանը փորձ արեց ներկայացել, թե իրենք վրդովված են այդ դրույթից, որ վիճահարույց հարցերը մասնագիտական քննարկումների չեն արժանացել և ընդհանրապես ՝ կառավարությունը արհամարհել է փաստաբանների կարծիքը:
