ԱՄՆ-ում հանվել են մեղադրանքները մոտ 20 տարի բանտում անցկացրած 2 մեքսիկացիներից։ 43-ամյա Գաբրիել Սոլաչեին և 45-ամյա Արտուրո Ռեյեսին կհանձնեն ԱՄՆ միգրացիոն և մաքսային հարցերով ոստիկանության աշխատակիցների ձեռքը՝ նրանց հայրենիք արտաքսելու համար։ Տղամարդիկ ճաղերի հետևում են անցկացրել մոտ 20 տարի։
Հինգշաբթի նրանց վրայից հանվել են ամուսնական զույգի սպանության և նրանց երեխայի առևանգման մեղադրանքները։ Ինչպես հայտնում է NY Daily News-ը, դեռևս 1998 թվականին տղամարդկանց դատապարտել էին ցմահ ազատազրկման։
Դատից հետո տղամարդիկ հայտարարել էին, որ Չիկագոյի ոստիկանության քննիչ Ռեյնալդո Գևարան կտտանքների է ենթարկել իրենց, որպեսզի իրենք ստանձնեն ուրիշի հանցանքի մեղավորությունը։ Միայն մոտ 20 տարի անց նահանգի դատախազը պարզել է, որ նրանց անհրաժեշտ է ազատ արձակել։
