«Ժամանակ» թերթը գրում է. «Մոսկվայի «Արարատ» ֆուտբոլային ակումբի նախագահ, գործարար Սամվել Կարապետյանի թիմը Հայաստանի առաջնություն տեղափոխելու մտադրությունը մեծ դժգոհություն է առաջացրել Երևանի «Արարատ» ակումբի ղեկավարների շրջանում:
Հիշեցնենք, որ «Արարատի» սեփականատերը շվեյցարահայ հայտնի գործարար Վարդան Սրմաքեշն է: Վերջինը «Franck Muller» ընկերության համասեփականատերն է և գլխավոր տնօրենը։ Ընկերությունը Հայաստանում կատարել է 1.3 միլիոն ԱՄՆ դոլարի ներդրում, ինչի արդյունքում կազմակերպվել է ժամացույցների և ոսկյա զարդերի արտադրություն։ Սրմաքեշը լայն գործունեություն է ծավալում նաև բանկային ոլորտում, մասնավորապես, «Արցախբանկի» 39.1 տոկոսի և «Արմսվիսբանկի» 80 տոկոսի բաժնետերն է։ 2013 թվականին Սրմաքեշը նշանակվել է Մարսելում Հայաստանի Հանրապետության պատվո հյուպատոս։
Տարիներ շարունակ այս գործարարը լուրջ ներդրումներ է կատարել Հայաստանում: Հայրենիքին մատուցած ծառայությունների համար պարգևատրվել է 1-ին աստիճանի մեդալով: Եվ ահա կտրականապես դեմ լինելով Մոսկվայի «Արարատ» անվանումով Հայաստանի առաջնությունում թիմի հայտնվելուն, Սրմաքեշը մտադիր է գործի դնել Հայաստանում և արտասահմանում ունեցած կապերն ու լծակները: Մեր տեղեկություններով՝ ՀՖՖ նախագահ Ռուբեն Հայրապետյանի և Հայաստանի նախագահ Սերժ Սարգսյանի հետ հանդիպումների միջոցով հարցը չկարգավորելու դեպքում Սրմաքեշը պատրաստ է դիմել միջազգային ատյանների դատարաններին:
Ըստ վերջին տեղեկությունների՝ Սամվել Կարապետյանի թիմը պատրաստվում է ներկայանալ «Արարատ-Մոսկվա» անվամբ: Սամվել Կարապետյանի համար այս անվանումը սկզբունքային է, քանզի «Արարատը» հայտնի բրենդ է, իսկ Մոսկվան կարող է թիմի շուրջ համախմբել այս քաղաքում բնակվող մեր հայրենակիցներին»:
