«Հանուն Հայաստան պետության» ճակատի նախաձեռնող խմբի անդամ Պետրոս Մակեյանը նշում է՝ իրենց խնդիրն է արթնացնել հասարակությանը, որպեսզի մարդիկ դուրս գան փողոց. «Առավել ևս՝ «Սասնա ծռեր»-ի մասով ժողովուրդը պարտք ունի, որովհետև նրանք դուրս եկան երկիրն ազատագրելու, բնականաբար՝ հույսը ժողովրդի ոտքի կանգնելն էր։ Ժողովուրդը հապաղեց և այդ պատճառով պարտքը հատուցելու խնդիր կա։ Ճակատը պետք է կարողանա ժողովրդին փողոց դուրս բերելու խնդիրը լուծել, որպես քաղաքական միավոր կայանա»,- «Առաջին լրատվական»-ի հետ զրույցում ասաց Մակեյանը։
Մեր այն դիտարկմանը, թե գուցե ժողովուրդը ոտքի չկանգնեց, որովհետև չընդունեց զենքով պայքարի մեթոդը, Մակեյանն արձագանքեց. «Գիտեք՝ այդ հարցում տարբեր մարդիկ, տարբեր կարծիքներ ունեն։ Կյանքը ցույց տվեց, որ 20 տարվա ընթացքում աշխարհում հայտնի ընտրական պրոցեսը՝ երբ ընտրություններով գալիս են իշխանության, ընտրություններով դուրս մնում, Հայաստանում չի աշխատում։ Հայաստանում ընտրական համակարգը զուտ իմիտացիա է, իսկ հետևում, ինչպես Սերժ Սարգսյանն է մի առիթով ասել՝ ցանկացած թիվ կարող են նկարել։ Սարգսյանի վերջին ելույթը հենց դրա ապացույցն էր։ Այս պարագայում ի՞նչ այլընտրանք է մնում։ Նույն Պավլիկն իր տղայի հետ ինչո՞ւ էր գնում այդ ճանապարհով։ Եթե տեսներ մի փոքր այլընտրանք՝ այդ ճանապարհը չէր ընտրի։ Գամ ձեր այն հարցին, որ այդ ճանապարհն էլ չարդարացվեց, ուրեմն մնում է մեկ ճանապարհ՝ ժողովրդի ցասումը»,- ասաց նա։
Մակեյանը հավելում է՝ հաշված օրերի ընթացքում այն կրիտիկական զանգվածը պետք է հավաքի հրապարակում, որից իշխանությունները շնչահեղձ կլինեն։
Հարցազրույցն ամբողջությամբ՝ տեսանյութում։
