Հայաստանի Հանրապետության Ազգային ժողովի ՀԱԿ խմբակցության պատգամավոր Նիկոլ Փաշինյանին Արագածոտնի մարզպետ Սարգիս Սահակյանի ներկայացրած պատկերը հակասական թվաց. մի կողմից՝ աշակերտները, աշխատողները նվազում են, մյուս կողմից՝ գործազրկությունը ևս նվազում է: Պատգամավորը նշեց, որ համեմատելով 2014-ի բյուջեի ոչ ֆինանսական ցուցանիշների տվյալները՝ պարզել է, որ 2012-2013 թթ. աշակերտների թվաքանակը Արագածոտնի մարզում 770-ով պակասել է: Նա նաև ընդգծեց, թե դպրոցների ֆինանսավորումն աշակերտների թվով է պայմանավորված։ Մարզպետը պատասխանեց, որ նշված թվերը չեն համապատասխանում իրականությանը, և որ 2013-ի սեպտեմբերի մեկին, 2012 թ. համեմատ, աշակերտների թիվը կրճատվել է 420-ով։ Գործազրկության միտումն, ըստ մարզպետի, նվազել է, սակայն կոնկրետ թվեր նշել նա չկարողացավ։
Սահակյանն ասաց, որ մարզում աշխատողների թիվը նվազել է, քանի որ մարդիկ սեզոնային աշխատանքի են մեկնում, իսկ աշակերտների թիվն էլ պայմանավորված է նրանով, որ մի մասն ավագ դպրոցներ են գնացել, մի մասն էլ՝ այլ դպրոցներ։
Փաշինյանը նկատեց, թե ամբողջ խնդիրը հենց այդ է՝ բոլոր մարզերում աշակերտների թիվը նվազել է, ինչին տեղից հակադարձեց Սյունիքի մազպետը՝ նշելով, որ իրենց մարզում հակառակն է՝ երեխաների թիվն ավելացել է։ ՀԱԿ պատգամավորն ասվածից հետևություն արեց. «Հիմա ստացվում է, որ ձեր աշակերտները գնացել են Սյունի՞ք»։