«Բոլոր կադրային փոփոխությունները, որոնք կատարվում են ընտրական փուլերից առաջ, հստակ ունեն քաղաքական նշանակություն։ 2018-ի գարնանը համապետական ընտրություն չի լինելու, բայց ամեն դեպքում ընտրություն է լինելու, և հիմա բոլոր փոփոխությունները այդ տրամաբանության մեջ են»,- «Առաջին լրատվական»-ի հետ զրույցում ասաց քաղաքագետ Էդգար Վարդանյանը՝ անդրադառնալով ԳՇ պետի տեղակալ Հայկազ Բաղմանյանի պաշտոնանկությանը։
Քաղաքագետի խոսքով՝ այս փոփոխությունները ցույց են տալիս, որ ձևավորվում է այն հիմնական իշխող քաղաքական թիմը արդեն իսկ այսօր իշխող քաղաքական վերնախավի շրջանակներում։ «Վերջին փոփոխությունները տեղավորվում են հենց այդ շրջանակում։ Սերժ Սարգսյանը և իր թիմը փորձում են քայլեր անել, ինչ-որ տեղ պոպուլիստական քայլեր անել, որոշ կոռուպցիոն տարրերի հեռացնելով՝ հանրության մեջ վստահություն են առաջացնում։ Ինչ-որ տեղ նաև փորձում են ավելի հավատարիմ թիմ ձևավորել, որոնք իրենց բացասական վարքով քիչ են հայտնի հանրությանը և կարող են իրենց ունակությունները ծառայեցնել նոր քաղաքական թիմի ամրապնդմանը»,- ասաց Վարդանայնը։
Քաղաքագետի դիտարկմամբ՝ մինչև 2018-ի գարուն մենք ականատես ենք լինելու կոսմետիկ բարեփոխումների։ «Ներկայիս իշխող քաղաքական թիմի գործունեության ամբողջ տրամաբանությունը այն է, որ ամրապնդեն իրենց սեփական դիրքերը, ցույց տան, որ իրենք գնում են բարեփոխումների ճանապարհով, Եվրոպայից ռեսուրսներ ներգրավեն՝ փորձելով չփչացնել հարաբերությունները նաև Կրեմլի հետ»,- ասաց Վարդանյանը՝ հավելելով, որ վերջին պաշտոնանկությունները, նաև առաջիկայում սպասվող փոփոխությունները Սերժ Սարգսյանի PR-ի համար են, որպեսզի 2018-ի գարնանը նա հանդես գա բարձր վարկանիշով, բացի այդ, նա ցանկանում է թիմ ձևավորել լոյալ մարդկանցով, որոնց կառավարելն ավելի հեշտ կլինի։
Առավել մանրամասն՝ տեսանյութում:
