Շուտով կլինի կես տարի, որ Հրազդանի քաղաքապետի որդու կողմից վթարի գործով մի շարք փորձաքննություններ են նշանակվել, սակայն դրանք այդպես էլ չեն ավարտվում և արդյունքները հայտնի չեն։
Քաղաքապետի որդու՝ 17-ամյա Ռազմիկ Դանիելյանի շահերի պաշտպան Հայկ Սարգսյանն «Առաջին լրատվական»-ի հետ զրույցում ասաց, որ գործով նշանակված փորձաքննություններից ոչ մի նորություն չկա։
Մեր դիտարկմանը, թե փորձաքննությունները կարո՞ղ են այդքան երկար ձգվել, և այդ ձգձգման մեջ արդյո՞ք միտում չկա, փաստաբանը կարճ պատասխանեց. «Ես չգիտեմ»։
Հայկ Սարգսյանը նաև նշեց, որ ներկա պահին գործով ոչ մի այլ քննչական գործողութուն չի կատարվում։
Հիշեցնենք, որ հունիսի 8-ին՝ ժամը 12։30-ի սահմաններում, Nissan Teana մակնիշի 444 ԼԼ 70 համարանիշի ավտոմեքենայի վարորդը՝ քաղաքապետի որդին, Հրազդան քաղաքում՝ Շահումյան փողոցում, վրաերթի էր ենթարկել հետիոտնին։ Կրտսեր Դանիելյանը ավտոմեքենայի համարանիշերը մեքենայի վրայից հանել էր և դեպքի վայրից դիմել փախուստի, իսկ վրաերթի ենթարկվածը՝ Հրազդան քաղաքի Միկրոշրջան թաղամասի 223 շենքի 12 բնակարանի բնակիչ՝ 58-ամյա Վալերի Թորոսյանը, ծայրահեղ ծանր վիճակում տեղափոխվել է Հրազդանի բժշկական կենտրոն, որտեղ գիտակցության չգալով մահացել էր։
Դեպքի առթիվ հարուցվել է քրեական գործ Քրեական օրենսգրքի 242 հոդվածի 2 մասի (Ճանապարհային երթևեկության և տրանսպորտային միջոցների շահագործման կանոնները խախտելը, որն անզգուշությամբ առաջացրել է մարդու մահ) հատկանիշներով։
Տուժողի հարազատները այդպես էլ դեպքից հետո բողոք չներկայացրին, իսկ քաղաքապետի որդին, անազատության մեջ հայտնվելու փոխարեն, Սերժ Սարգսյանի կողմից արժանացավ ոսկե մեդալի։
