Իրանի Իսլամական Հանրապետությունը շատ լավ հարաբերություններ ունի հարեւան պետությունների հետ, մասնավորապես՝ բարձր մակարդակի համագործակցություն Հայաստանի հետ: ՀՀ արտաքին գործերի նախարար Էդվարդ Նալբանդյանի հետ համատեղ ասուլիսի ընթացքում այս մասին հայտարարեց Իրանի Իսլամական Հանրապետության արտաքին գործերի նախարար Մոհամմադ Ջավադ Զարիֆին:
«Վերջին տարիների քաղաքական եւ տնտեսական հարաբերությունները բարձր մակարդակի վրա են եղել, ինչպես նաեւ պետք է նշեմ մեծարգո նախագահ դոկտոր Ռոհանիի երդմնակալության արարողությանը մասնակցության եւ ՀՀ վարչապետի՝ Իրան կատարած այցի մասին, որոնք երկկողմ հարաբերությունների շրջանակում շատ կարեւոր են: Բավականին լավ հնարավորություն է ընձեռնված երկու երկրների միջեւ տնտեսական հարաբերությունների զարգացման համար: Այսօր ինձ ուղեկցել են տնտեսական ոլորտի ներկայացուցիչներ եւ գործարարներ. նրանք Հայաստանում են: Հայաստանի հետ համագործակցության շրջանակում կարեւորագույն ոլորտներից են էներգետիկ եւ տարանցման ոլորտները, բնապահպանությունը: Գիտության եւ տեխնոլոգիաների ոլորտում համագործակցությունը նույնպես շատ ենք կարեւորում: Ինչպես նաեւ շնորհակալություն ենք հայտնում Հայաստանի Հանրապետությանը աջակցության համար միջազգային հարթակներում: Միասին աշխատում ենք, որպեսզի այս տարածաշրջանում խաղաղություն եւ կայունություն պահպանվի: Ուրախ եմ, որ հաջողություն ենք գրանցել երկկողմ հարաբերությունների բոլոր ոլորտներում»,-ասաց Իրանի արտգործնախարարը՝ նաեւ շնորհակալություն հայտնելով Հայաստանի ժողովրդին եւ ղեկավարությանը վերջերս Իրանում տեղի ունեցած երկրաշարժի կապակցությամբ ցավակցական ուղերձների համար:
