Ռումինիայի բնակիչը, ով խոստովանել է Գոգենի, Մոնեի և Պիկասոյի կտավների գողությունը, հայտարարել է, որ մտադիր է դատի տալ նիդեռլանդական թանգարանին այն բանի համար, որ գողությունն անհավանական հեշտ է ստացվել:
Ինչպես տեղեկացնում է Associated Press-ը, 2012 թ. հոկտեմբերի 16-ին Նիդեռլանդների Ռոտերդամ քաղաքում թալանվել էր Կյունստհոլ թանգարանը, որը բացվել է 1992 թ.: Այնտեղից տարվել էին Պիկասոյի, Մոնեի և Գոգենի կտավները:
Այդ ժամանակ էլ ոստիկանությունը հայտարարել էր, որ չնայած կտավների արժեքներին, նրանցից ոչ մեկին տագնապային ազդանշան միացված չի եղել:
Ոստիկաններին հաջողվել էր գտնել գողերին, որից հետո իրավապահներն ապարդյուն փորձել էին պարզել կտավների գտնվելու վայրը: Ձերբակալվածներից մեկի մայրը հայտարարել էր, որ դրանք վառարանում վառել է, որպեսզի վերացնի իր տղայի դեմ եղած հանցանշանները:
Եվ իսկապես մոխրի մեջ հայտնաբերվել էին կտավների մնացորդները և շրջանակների մեխերը: Այնուհետև այդ գողերից մեկը՝ Ռադու Դոգարուն, հայտարարել էր, որ կտավներն իրականում չեն ոչնչացվել, սակայն նա չի կարող ասել դրանց գտնվելու վայրը, քանի որ դրանք վաճառվել են:
Դոգարուն մոխրի մեջ եղած կտավների մնացորդները բացատրել է նրանով, որ իր ընտանիքը XIX դարի այլ կտավներ էլ է ունեցել:
Իսկ ձերբակալվածների ռումինացի փաստաբանը հայտարարել է, որ իր հաճախորդը կարող է վերադարձնել գողոնի մի մասը, այնուհետև խոստովանել է, որ դրանք Մոլդովայում են:
Սակայն Դոգարուն քննիչներին հայտնել էր, որ կտավներն իրականում հանձնել է մի ուկրաինացու՝ Վլադիմիր Վլադիմիրենկոյին, ով ապրում է Լոնդոնում:
Թանգարանի ներկայացուցիչը հետաքննության վերջին արդյունքների հիման վրա հայտարարել է, որ տվյալ պահին կտավների գտնվելու վայրն անհայտ է:
Իսկ դատական նիստի ժամանակ Դոգարուն հերթական անգամ ցնցել է իրավապահներին իր հայտարարությամբ այն մասին, թե պատրաստվում է թանգարանին դատի տալ չափազանց հեշտ գողության համար:
«Ես նույնիսկ չէի էլ մտածել, որ թանգարանը կարող է թանկարժեք իրերն առանց պահպանության թողնել՝ այնտեղ ոչ պահակներ, ոչ էլ տագնապի ազդանշաններ չկային: Ես թանգարան եմ մտել սովորական պտուտակահանի օգնությամբ»,- պատմել է Ռումինիայի բնակիչը: Իսկ նրա փաստաբանը հավելել է, որ խոսքն անփութության մասին է, որը ծանր հետևանքներ է ունեցել:
Մասնագետները նշում են, որ թանգարանի աշխատակիցների մեղքը հաստատվելու դեպքում թանգարանը ստիպված կլինի կիսել փոխհատուցման ծանրությունը իր հաճախորդի՝ մասնավոր հիմնադրամի հետ, որն արդեն միլիոնավոր հայցեր է ստացել ապահովագրական ընկերություններից:
