Վաղը «Կոնգրես» հյուրանոցում կայանալու է վերածնված ՀՀՇ կուսակցության հիմնադիր համագումարը: Վերածնված ՀՀՇ կուսակցության անդամ Ալիկ Արզումանյանի խոսքով՝ համագումարին հրավիրված են իրենց համախոհները, իսկ կուսակցություններից՝ ընդդիմադիր դաշտի կուսակցությունները: Հրավիրված են «Ժառանգությունը», Արամ Սարգսյանի «Հանրապետությունը», «Պահպանողական», «Ժողովրդավարական հայրենիք» կուսակցությունները, ՀՅԴ-ն: ՀԱԿ-ը հրավիրված չէ:
«ՀԱԿ խմբակցության անդամ կուսակցությունների ներկայացուցիչներին հրավեր ուղարկվել է, բայց ՀԱԿ-ին՝ ոչ»,- «Առաջին լրատվական»-ի հետ զրույցում ասաց Ալիկ Արզումանյանը:
Հետաքրքրվեցինք` ՀԱԿ-ի հետ առկա տարաձայնություններն ու Լևոն Տեր-Պետրոսյանի կողմից ՀՀՇ-ն «գեղի կլուբ» անվանե՞լն է պատճառը:
«Մենք որևէ մեկի հետ տարաձայնություն չունենք, առավել ևս՝ ՀԱԿ-ի: ՀԱԿ կուսակցությունը ստիպել է մեզ վերագրանցել ՀՀՇ-ն: Իրենք ՀՀՇ-ի անունը փոխել են, դրել են ՀԱԿ ու չգիտես՝ ինչով են զբաղվում: Մենք ՀՀՇ կուսակցության գաղափարախոսության ժառանգորդներն ենք, իսկ թե ինչ է ՀԱԿ-ն այս պահին՝ թող իրենք ճշտեն, հասկանան»:
Հարցին՝ իշխանական թևից որևէ կուսակցություն հրավիրված չէ՞, պատասխանեց. «Մենք իշխանության հետ ի՞նչ գործ ունենք:
Արզումանյանի խոսքով՝ կուսակցության անվան գրանցման հետ կապված խնդիր չի առաջանա, քանի որ այս պահին ՀՀՇ անվանում ունեցող կուսակցություն չկա:
«Կա մեր հայտը՝ ներկայացված պետռեգիստր: Իսկ թե ինչ կարող է լինել՝ դժվարանում եմ ասել: Մենք ոչ ամենաժողովրդավարական երկրում ենք ապրում, կարող է և չգրանցեն` հանձնարարություն ստանալու պարագայում: Կապրենք՝ կտեսնենք»,- ասաց նա:
Ի՞նչ է հաջորդելու է ՀՀՇ համագումարին, կուսակցությունը զբաղվելո՞ւ է ակտիվ քաղաքականությամբ՝ հարցին Ա. Արզումանյանը պատասխանեց. «Կուսակցությունը գրանցվում է, որպեսզի քաղաքականությամբ զբաղվի: Իսկ թե ակտիվը պասիվից ով է տարանջատում՝ չգիտեմ, բայց 3 օրվա մեջ իշխանափոխություն անել, հավանաբար, չենք հասցնի»: