Սաուդյան Արաբիայի գահաժառանգ արքայազն Մուհամմադ բեն Սալման Ալ Սաուդը հայտնել է, որ կոռուպցիայի մեջ մեղադրվող արքայազնների մեծ մասը համաձայնել է գնալ մինչդատական կարգավորման և փոխանցել ակտիվների կամ բիզնեսի մի մասը Սաուդյան Արաբիայի իշխանություններին՝ ազատության դիմաց։ Այս մասին հայտնում է The New York Times-ը։
Մինչդատական կարգավորման է դիմել մեղադրվողների 95 տոկոսը։
The New York Times-ի հաղորդմամբ՝ մեղադրվողների 1 տոկոսը կարողացել է ապացուցել իր անմեղությունը, ևս 4 տոկոսը պնդում է, որ չի հանդիսանում կոռումպացված։
Մուհամմադ բեն Սալման Ալ Սաուդի գնահատականով՝ ընդհանուր առմամբ բյուջեն համալրվել է մոտ 100 մլրդ դոլարով։
Հիշեցնենք, որ նոյեմբերի 5-ին մոտ 30 նախկին և գործող նախարարներ, ձեռնարկատերեր, բարձրաստիճան պաշտոնյաներ և 11 արքայազններ ձերբակալվել էին կոռուպցիոն կասկածանքով։ Նրանցից մեկը խոշորագույն սաուդցի գործարար և Citigroup-ի համասեփականատեր Ալ-Վալիդ բեն Թալալն է։
