Հայաստանում դեռևս դժվար տնտեսական վիճակ է, ես չեմ ուզում ձևացնել, թե դա այդպես չէ, երեկ հայտարարել է Հայաստանում ԱՄՆ դեսպան Ռիչարդ Միլզը՝ ասելով, որ եթե Հայաստանը շարունակի տնտեսական բարեփոխումները, ապա մարդիկ ավելի քիչ կլքեն երկիրը և կմնան Հայաստանում աշխատելու: Փաստորեն, ԱՄՆ դեսպանը միանգամից անում է երկու բացասական արձանագրում՝ Հայաստանում տնտեսական դժվար վիճակ է, և այսպես ասած՝ բարեփոխումները չեն տալիս արդյունք, և մարդիկ հեռանում են Հայաստանից:
Այլ կերպ ասած՝ ԱՄՆ դեսպանը ցածր գնահատական է նշանակում ներկայումս վարվող տնտեսական քաղաքականությանը, կառավարման արդյունքին: Դժվար է ասել, թե հատկապես ո՞վ է ստանում այդ գնահատականը՝ վարչապետ Կարեն Կարապետյա՞նը, թե՞ Սերժ Սարգսյանը, սակայն մի բան, թերևս, ակնհայտ է, որ մեղմ ասած՝ հաճախ չես տեսնի, որ Հայաստանում ԱՄՆ դեսպանը անի հայտարարություններ, որտեղ բացասական գնահատականը գերակշռում է դրականին: Դա նշանակում է, որ Նահանգները դժգոհ է ինչ-որ բանից: Հատկապես ինչից, դժվար է ասել, բայց խոսքն, իհարկե, վերաբերում է կառավարման որակին, տնտեսական քաղաքականությանը, այսպես ասած՝ բարեփոխումներին:
Հիշարժան է, որ դեսպան Միլզը բավականին բացասական կարծիք էր հայտնել նախորդ կառավարության գործունեությունից, երբ պաշտոնանկ էր եղել Հովիկ Աբրահամյանը: Նա հայտարարել էր՝ Միլզը, որ կառավարությունը անբավարար էր աշխատել կոռուպցիայի դեմ պայքարի ուղղությամբ, և այդ իսկ պատճառով էլ ԱՄՆ-ն ֆինանսավորել էր հակակոռուպցիոն խորհրդի համար ֆինանսավորման ընդամենը 2 տոկոսը, այսինքն՝ Ռիչարդ Միլզը 2 էր գնահատել Հովիկ Աբրահամյանի կառավարության արդյունավետությունը:
Միևնույն ժամանակ, դա տեղի էր ունեցել կառավարության պաշտոնանկությունից հետո, իսկ դրա գործունեության ընթացքում ԱՄՆ դեսպանը, այսպես ասած, լավատեսական մեսիջներ էր հաղորդում՝ փորձելով, թերևս, ոգևորել և օգնել կառավարությանը: Բայց, ինչպես երևում է, ամերիկացի դիվանագետն արձանագրել է, որ Հայաստանի կառավարությունները դրանից ոգևորվում են, սակայն ոչ թե ավելի լավ աշխատում, այլ այսպես ասած՝ հանգստանում այդ դափնիների վրա, համարելով, որ իրենց հաջողվել է, այսպես ասած, համոզել միջազգային հանրությանը և մասնավորապես Նահանգներին, որ բարեփոխումներ են իրականացնում և վիճակ փոխում:
Ըստ երևույթին, ունենալով Հովիկ Աբրահամյանի կառավարության փորձը՝ Կարեն Կարապետյանի կառավարության դեպքում դեսպան Միլզը նախընտրում է դժգոհությունը՝ թեկուզ զգուշավոր, զուսպ, բայց արտահայտել կառավարության գործունեության ժամանակահատվածում, ոչ թե դրա պաշտոնանկությունից հետո գնահատել 2, այդպիսով իրականում երես տալով հաջորդ կառավարությանը:
