Հայաստանի Հանրապետության կառավարության աշխատակազմի ղեկավար-նախարար Վաչե Գաբրիելյանը հոկտեմբերի 23-ին Ազգային ժողովում «Պետական պաշտոններ զբաղեցնող անձանց վարձատրության մասին» ՀՀ օրենքի նախագծի քննարկման ժամանակ ՀԱԿ պատգամավոր Նիկոլ Փաշինյանին խորհուրդ տվեց փոխել նախագծի շուրջ շեշտադրումները: Գաբրիելյանի համոզմամբ՝ շատ ավելի կարևոր է՝ արդյոք համակարգը համադրելի՞ է այլ երկրների հետ, աշխատավարձերի չափի անհամամասնությունը շա՞տ է, թե՞ ոչ, դա ծնում է կոռուպցիոն ռիսկե՞ր, թե՞ փակում է դրանք:
«Մեր հասարակությունում գործատուի, տվյալ դեպքում՝ ժողովորդի կամքն արտահայտվում է ԱԺ որոշումներում: Թե գործատուն ինչ է մտածում, արտահայտությունը լինում է ԱԺ որոշումներում: Կարծում եմ՝ ԱԺ-ն համապատասխանաբար կորոշի, գործատուն իր քվեարկությամբ, փաստարկներով և ելույթներով կարտահայտի իր վերաբերմունքը»,- ասաց նա:
Նրա խոսքով՝ եղել են աշխատավարձեր, որ 2002, 2007 թվերին են բարձրացվել, դրանից առաջ ու հետո որոշ աշխատավարձեր սառեցվել են ուղղակի, մտածել ենք՝ այդ մարդկանց պետք չէ աշխատավարձ տալ, քանի որ նրանք պաշտոնյա են, ինչը կոռուպցիոն ռիսկեր է առաջացնում:
Գաբրիելյանի խոսքին Փաշինյանը հակադարձեց՝ նշելով, որ ԱԺ-ն չի արտահայտում ժողովրդի կարծիքը: Դրա վկայությունն է այն, որ այսօր իսկ ընդունվեց օրենքի նախագիծ, որով որոշվում է գործազուրկների նպաստը վերացնել: «Բոլորս քննարկում ենք՝ նախագահի աշխատավարձը 203, իսկ վարչապետինը և ԱԺ նախագահինը՝ 218 տոկոսով ավելացնելու մասին հարցը. սա արդեն ցույց է տալիս՝ ինչքանով է արտահայտված այդ կամքը»,- ասաց նա:
ՀԱԿ անդամը նկատեց՝ երբ «Զբաղվածության մասին» օրենքն էր քննարկվում, դահլիճում 11 պատգամավոր կար, իսկ պաշտոնյաների աշխատավարձի հարցի քննարկման ժամանակ դահլիճը հանկարծ բազմամարդ դարձավ: Փաշինյանը ընդգծեց, որ աշխատավարձերի բարձրացմանն արժանանալ է պետք, ինչին ի պատասխան՝ նախարարը նշեց, որ դժվարանում է ասել՝ պատգամավոր Նիկոլ Փաշինյանն արժանացե՞լ է արդյոք, որ նրա աշխատավարձը բարձրանա, սակայն իր համար ավելի կարևոր է՝ արդյոք այս համակարգը կօգնի՞, որ նա իրեն ազատ զգա իբրև պատգամավոր:
