Ռուս երգչուհի Զեմֆիրան ներողություն է խնդրել անզսպության համար, որով նա արձագանքել է հանդիսատեսի պահվածքին:
Կիրակի օրը կայացած համերգի ժամանակ Զեմֆիրան երգել է. «Ես երբեք Ռոստով չեմ վերադառնա», ինչպես նաև բեմից անհարգալից արտահայտություններ է արել:
«Ես ցանկանում եմ ներողություն խնդրել իմ անզսպության համար: Հատկապես տհաճ է, որ իմ վատ արտահայտությունները լսել են երեխաները, դա նրանց պետք չէ»,- գրել է Զեմֆիրան իր կայքում:
Երգչուհու արարքը համացանցում բուռն քննարկումների թեմա է դարձել: Որոշ ականատեսներ դա բացատրել են հանդիսատեսի վարքով, որն անընդհատ ընդհատել է նրա ելույթը և պահանջել պատվերով երգեր կատարել:
Դրանից բացի, համեգից երկու օր առաջ այն տապալման եզրին էր համերգային սրահի տնօրենի մերժման պատճառով: Համերգը կայացել է միայն տեղական իշխանությունների միջամտությունից հետո:
