Տուբերկուլյոզի դեմ պայքարի ազգային կենտրոնում շուրջ 80 աշխատակցի հաստիք կրճատվել է։ «Առաջին լրատվական»-ի հետ զրույցում Տուբդիսպանսերի արտաթոքային բաժանմունքի մի շարք աշխատակիցներ ընդգծեցին, որ տնօրինությունը իրենց պարտադրողաբար է հեռացրել, փոխարենը թղթեր են տալիս, որպեսզի արձանագրեն, թե սեփական դիմումի համաձայն են ազատվել աշխատանքից։
«Տուբերկուլյոզով ախտահարված հիվանդներն անշարժ ողնաշարով պառկած են, մենք նրանց կերակրում ենք, բաժանմունքում անընդհատ սննդի հարցով զբաղվող ինչ-որ մեկն է պետք, իսկ հիմա մի հոգին են թողել, որն ընդամենը 2-3 ամիս է աշխատում հիմնարկում, 14-15 տարվա աշխատողներիս կրճատել են։ Էդ մի հոգին և՛ մանկական բաժանմունքը, և՛ վիրաբուժական բաժանմունքը, և՛ մեր բաժանմունքը պիտի սպասարկի։ Շատ անարդար է, տարեվերջին, երբ տոներ են մոտենում, մենք մնում ենք փողոցում։ Մեզ ոչ մի տեղ գործի չեն վերցնի, որովհետև ռիսկի գոտում աշխատել ենք, ես ի՞նչ պետք է անեմ»,- նշեց բաժանմունքի բուֆետի աշխատակցուհի Անահիտ Սերոբյանը, որը թեև իրերն էր հավաքում հեռանալու համար, բայց չէր պատրաստվում դիմում գրել, որ սեփական նախաձեռնությամբ է հեռանում։ Նրա խոսքերով՝ եթե հեռացնում են, ուրեմն պետք է դրանով պայմանավորված բոլոր պարտավորությունները կատարեն, ոչ թե փորձեն դրանից էլ ազատվել։
Հեռացվող աշխատակցուհիները ընդգծում էին, որ տարիներ շարունակ աշխատել են անմխիթար վիճակում գտնվող բաժանմունքում, բայց իրենց պարտականությունները կատարել չեն զլացել, հիմա իրենց հեռացնելով են շնորհակալություն հայտնում։
Բաժանմունքի վարիչ Լևոն Խալաթյանը ևս դեմ է օպտիմալացումներին, ասում է՝ առանց այն էլ նախորդ տարիներին այնքան աշխատողներ են կրճատվել, որ ամեն աշխատող առանց այն էլ ծանրաբեռնված է աշխատել։ Նա ընդգծեց, որ նույնիսկ փորձ է արվել բաժանմունքը միացնել վիրաբուժական բաժանմունքին, բայց գործընթացն այս պահին կանգնեցված է։
«Առաջին լրատվական»-ի հետ զրույցում դժգոհեցին նաև հիվանդները։
Տուբերկուլյոզի դեմ պայքարի ազգային կենտրոնի տնօրեն Արմեն Հայրապետյանն էլ նշեց, որ աշխատողների հաստիքների օպտիմալացումը կապված է նաև հիվանդացության ցուցանիշի կրճատման հետ։
«Տարեց տարի իրականացրել ենք գործողություններ, քայլեր, որ համահունչ լինի այսօրվա իրավիճակին։ Մենք 2014թ-ին էլ ենք իրականացրել օպտիմալացման գործընթաց, 2015, 2016-ին էլ, և որոշակի ծառայությունների և մասնագետների առումով, և նույն էլ կառուցվածքային առումով։ Նույն էլ այս անգամ էր՝ հաշվի առնելով, այն որ այսօր հիվանդանոցում 90-100 հիվանդ ունենք, հոսպիտալացված հիվանդների թիվը գրեթե 3 անգամ նվազել է, հետևաբար, այն քանակը, որը սպասարկում է 300 հոգու, բնական է, որ ավելի քիչ պիտի լինի։ Հիվանդանոցում ոչ մի բժիշկ չի կրճատվել, բուժքույրերի համար էլ իրականացրել ենք մրցույթ»,- շեշտեց նա։
Մանրամասները՝ տեսանյութում։
